महापालिकेत भाजपचे ८९ तर शिवसेनेचे २९ असे ११८ नगरसवेकांचे संख्याबळ आहे. मात्र, अजूनही दोन्ही पक्षांनी कोकण भवन येथे गट नोंदणी केलेली नाही. परिणामी ३१ जानेवारी रोजी होणारी महापौर निवडणूक लांबणीवर पडण्याची शक्यता आहे. दोन्ही पक्षांनी गट नोंदणी न केल्याने राजकीय वर्तुळात तर्क-वितर्क लढविले जात आहेत. अखेरीस गट नोंदणीसाठी २७ जानेवारीचा मुहूर्त निश्चित करण्यात आल्याचे समजते. मुख्यमंत्री आज, २५ जानेवारीला दावोस दौऱ्यावरून परतणार आहेत. त्यानंतर उपमुख्यमंत्री एकनाथ शिंदे यांच्याशी ते महापौरपदासंदर्भात चर्चा करतील, त्याचवेळी एकच गट नोंदणी करण्यासंदर्भातही या बैठकीत चर्चा होईल, अशी माहिती पक्ष सूत्रांकडून देण्यात आली.
महानगरपालिकेत स्थायी समिती, शिक्षण समिती, आरोग्य समितीसह इतर अनेक समित्या कार्यरत असतात. या समितीमध्ये पक्षांच्या संख्याबळानुसार सदस्यांची निवड केली जाते. मुंबईत भाजप आणि शिवसेनेने वेगवेगळ्या गटाची नोंदणी केल्यास सदस्य संख्येवर त्याचा परिणाम होऊ शकतो. परिणामी महायुती म्हणून एकच गट नोंदणी केल्यास समितीमध्ये सदस्य संख्या वाढण्याची शक्यता असल्याने त्यासंदर्भातील चाचपणी दोन्ही पक्षांकडून सुरु असल्याचे कळते.
शिवसेनेकडून दुजोरा नाही
एकच गट नोंदणी करण्यासंदर्भात शिवसेनेच्या नेत्यांकडून कोणत्याही प्रकारचा दुजोरा देण्यात आलेला नाही. एकीकडे महायुतीचे संख्याबळ ११८ इतके आहे. तर विरोधकांचे संख्याबळही १००च्या घरात आहे. परिणामी समित्यांमध्ये विरोधकांनाही मोठ्या प्रमाणात प्रतिनिधित्व मिळण्याची शक्यता आहे. त्यामुळे एखाद्या प्रस्तावावर अंतिम निर्णय घेताना भाजपची दमछाक होण्याची शक्यता आहे. त्यामुळे इतर पक्षाचा पाठिंबा मिळावा याकरिता प्रयत्न सुरु असल्याने गट नोदंणीकरिता विलंब लागत असल्याची माहिती शिवसेनेतील ज्येष्ठ नेत्यांकडून देण्यात आली.