महाड नगरपरिषद निवडणुकीच्या पार्श्वभूमीवर राष्ट्रवादी काँग्रेस पार्टी आणि शिवसेना या दोन गटांमध्ये तीव्र वादातून तुंबळ हाणामारी झाली होती. या प्रकरणी महाड शहर पोलीस ठाण्यात परस्परविरोधी हाफ मर्डरचे गुन्हे दाखल करण्यात आले होते. घटनेनंतर पोलिसांनी तपास करत सुशांत जाबरे गटातील तीन आणि गोगावले गटातील तीन अशा एकूण सहा आरोपींना अटक केली होती. मात्र, दोन्ही गटांतील काही आरोपी गेल्या जवळपास दोन महिन्यांपासून फरार होते.
Satara News: साताऱ्यातील निष्ठावंताचे ‌‘पाय छाटले‌’, उमेदवारी डावलताच भाजप माजी तालुकाध्यक्ष धनुष्यबाणाच्या चिन्हावर मैदानात
दरम्यान, काल झालेल्या न्यायालयीन सुनावणीदरम्यान मंत्री भरत गोगावले यांचे पुत्र विकास गोगावले अद्याप पोलिसांच्या ताब्यात का नाहीत, असा थेट सवाल न्यायालयाने उपस्थित केला. तसेच राज्य सरकार आणि पोलिस यंत्रणेला न्यायालयाने चांगलेच फटकारले. न्यायालयाने स्पष्ट आदेश देत आज सकाळी अकरा वाजेपर्यंत विकास गोगावले यांना हजर करण्याचे निर्देश दिले होते.

न्यायालयाच्या आदेशानुसार, आज विकास गोगावले यांच्यासह पुतण्या महेश गोगावले, भाचा विजय मालुसरे, प्रशांत शेलार, धनंजय मालुसरे, वैभव मालुसरे, सुरज मालुसरे आणि सिद्धेश शेठ यांनी महाड शहर पोलिस ठाण्यात शरणागती पत्करली आहे. त्यानंतर सर्व आरोपींना न्यायालयात हजर करण्यात आले.

न्यायालयात झालेल्या सुनावणीनंतर आठही आरोपींना दोन दिवसांची पोलीस कोठडी सुनावण्यात आली असल्याची माहिती महाड शहर पोलीस ठाण्याकडून देण्यात आली आहे. यापूर्वी अटक करण्यात आलेल्या दोन्ही गटांतील आरोपींनाही अद्याप जामीन मंजूर झालेला नाही. त्यामुळे या प्रकरणात पोलिस तपास अधिक वेगाने होण्याची शक्यता वर्तवली जात आहे.

महाडमधील या राजकीय राडा प्रकरणामुळे जिल्ह्यात मोठी खळबळ उडाली असून, मंत्रीपुत्राच्या शरणागतीनंतर प्रकरणाला नवे वळण मिळाले आहे. आता पुढील तपासात नेमकी कोणती माहिती समोर येते आणि दोषींवर काय कारवाई होते, याकडे सर्वांचे लक्ष लागले आहे.