शिंदेसेना आणि मनसे युतीच्या हालचाली महापालिका निवडणुकीचा निकाल लागल्यानंतर ३ दिवसांनी सुरु झाल्या. मनसेला या निवडणुकीत ५ जागा मिळाल्या. भाजपला शह देण्यासाठी दोन्ही पक्षांनी एकत्र येण्याचा निर्णय घेतला. त्यासाठी पहिली बैठक ठाण्यातील येऊरमध्ये झाली. त्या बैठकीला शिवसेनेचे खासदार श्रीकांत शिंदे , मनसेचे नेते राजू पाटील आणि संदीप देशपांडे उपस्थित होते. ही बैठक १९ जानेवारीला झाली. यानंतर २० जानेवारीला मुंबईच्या वांद्रे येथील ताज लँड्स एंडमध्ये दुसरी बैठक पार पडली. या बैठकीत युतीच्या निर्णयावर शिक्कामोर्तब झालं. मनसेनं पाठिंबा दिल्याची घोषणा श्रीकांत शिंदे यांनी २२ जानेवारीला नवी मुंबईतील कोकण भवन परिसरातून केली.

मनसेचे प्रमुख राज ठाकरे यांना शिंदेसेनेत सोबत झालेल्या युतीची पूर्ण कल्पना होती. त्यांना कळवूनच मनसेचे नेते बैठकांना उपस्थित राहिले. शिंदेसेनेसोबत जाण्याची गरज त्यांना पटवून सांगण्यात आली. स्थानिक समीकरणं लक्षात घेऊन युतीचा निर्णय घेण्यात आला. या सगळ्याला गेल्या तीन ते चार महिन्यांमध्ये घडलेल्या घडामोडी कारणीभूत आहेत.

महापालिकेची निवडणूक लक्षात घेऊन भाजपचे प्रदेशाध्यक्ष रविंद्र चव्हाण यांनी आक्रमक हालचाली सुरु केल्या. शिंदेसेनेचे अनेक माजी नगरसेवक त्यांनी गळाला लावले. पदाधिकाऱ्यांना भाजपमध्ये घेतलं. मनसेच्या माजी नगरसेवकांनादेखील चव्हाण यांनी भाजपमध्ये घेतलं. त्यामुळे राजू पाटील प्रचंड अस्वस्थ झाले. फोडाफोड आणि पक्षप्रवेश थांबवा, असे विनंती करणारे निरोप त्यांना देण्यात आले. पण चव्हाणांनी पक्षांतरांचा धडाका लावला.

अखेर एकनाथ शिंदे यांनी थेट दिल्ली गाठली आणि चव्हाण यांची तक्रार गृहमंत्री अमित शहांकडे केली. त्यानंतर स्थानिक पातळीवर युतीचा निर्णय झाला. कल्याण-डोंबिवलीत शस्त्रसंधी झाली. पण श्रीकांत शिंदे आणि राजू पाटील संधीची वाट पाहात होते. अखेर महापालिका निकालानंतर दोघांना संधी मिळाली. राजू पाटील आणि श्रीकांत शिंदे यांचं जमत नाही. पण दोघांचा शत्रू एकच असल्यानं दोन्ही नेत्यांनी सोबत येण्याचा निर्णय घेतला.