नेमकं प्रकरण काय?
प्रभाग क्रमांक सोळामधील भाजपच्या उमेदवार पुष्पा अनिल ताजनपुरे यांनी उपनगर पोलिसांत फिर्याद दिली आहे. त्यानुसार शिवसेना शिंदे गटाच्या नगरसेवक संशयित पूजा प्रवीण नवले, त्यांचे पती प्रवीण अर्जून नवले यांच्यासह पंधरा अज्ञात संशयितांवर गुन्हा नोंद आहे. नवले विजयी झाल्यानंतर सायंकाळी पाच वाजता डीजेच्या आवाजात त्यांची मिरवणूक निघाली. चारशे ते पाचशे जनसमुदाय असलेली मिरवणूक मार्गस्थ होत असताना त्यातील प्रवीण नवले व काही कार्यकर्ते मुख्य रस्त्यापासून आत ताजनपुरेंच्या बंगल्याकडे गेले. तेथे शिवीगाळ, अश्लील घोषणाबाजी करीत सुतळी बॉम्ब व फटाके फोडले. हे ज्वलनशील पदार्थ त्यांनी ताजनपुरे यांच्या बंगल्याच्या आवारात फेकल्याने पार्किंगमध्ये आग लागली.

Girish Mahajan: भाजपसाठी महाजन पुन्हा ठरले ‘किंगमेकर’! नाशिकसह उत्तर महाराष्ट्रात पुन्हा गाजवला डंका
परिसरातील नागरिक जमल्यानंतर फिर्यादी व त्यांची मुलगी बंगल्याबाहेर गेल्या. आग नियंत्रित करण्याचा प्रयत्न सुरू असताना संशयितांनी पुन्हा अश्लील शेरेबाजी व हावभाव केले. ‘आज यांना जाळून, संपवून टाका’, अशी चिथावणी संशयितांनी दिली. तेव्हा दोन अज्ञात व्यक्ती ताजनपुरे यांच्या अंगावर धावून आले. त्यांच्या हातात ज्वलनशील पदार्थ होता. त्यांनी फिर्यादीला धक्का देत मारहाण करून गळ्यातील पाच तोळे वजनाचे सुमारे अडीच लाखांचे सोन्याचे मंगळसूत्र जबरदस्तीने खेचले.

Malegaon Municipal Election Results 2026 : भाजपला सर्वात मोठा धक्का, ८४ पैकी फक्त २ जागा, शिंदेंनाही धक्का, कोणत्या महापालिकेत फेरबदल?
फिर्यादींना वाचविण्यासाठी त्यांचे पुतणे धावत आल्यावर संशयितांनी त्यांनाही मारहाण केली. त्यावेळी संशयितांचे समर्थक बंगल्यात शिरण्याचा प्रयत्न करीत होते. फिर्यादींनी आरडाओरड केल्यावर संशयित मुख्य रस्त्याकडे पळून गेले व त्यांनी डीजेचा आवाज वाढवून मिरवणूक पुन्हा मार्गस्थ केल्याचे फिर्यादीत नमूद आहे. याप्रकरणी उपनगर पोलिस पुढील तपास करीत असून, संशयितांपैकी काहींना अटक होण्याची शक्यता आहे.