मुंबई महापालिकेसाठी प्रभाग क्रमांक २ मध्ये एकेकाळच्या घट्ट मैत्रिणींमध्ये लढत होत आहे. ठाकरे गटाला सोडचिठ्ठी देत भाजपवासी झालेल्या तेजस्वी घोसाळकर विरुद्ध धनश्री कोलगे (शिवसेना-ठाकरे) आणि मेनका गिरीश सिंह (काँग्रेस) यांच्यात लढत होत आहे. या निवडणुकीमध्ये कोण बाजी मारणार? याबाबत उत्सुकता आहे.

२०१७ मध्ये प्रभाग एक मधून तेजस्वी घोसाळकर निवडून आल्या होत्या. त्या आता प्रभाग दोनमधून भाजपच्या तिकिटावर निवडणुकीच्या रिंगणात आहेत. पक्षातील फाटाफुटीनंतरही ठाकरेंसोबत राहिल्याने त्यांच्या निष्ठेचे गोडवे गायले जात असत, मात्र ऐन महापालिका निवडणुकीच्या तोंडावर त्यांनी ठाकरेंना जय महाराष्ट्र करत भाजपचा हात हाती धरला. नगरसेविका म्हणून लोकोपयोगी कामं केलेल्या घोसाळकरांना पक्षबदलानंतरही फायदा होणार की निष्ठा मोडल्याचा धक्का बसणार, याचं उत्तर १६ जानेवारीला मिळेलच, परंतु त्याआधी महाराष्ट्र टाइम्स ऑनलाईनने नेटिझन्सचा कौल जाणून घेतला आहे.
BMC Election : माजी महापौर पुन्हा जिंकू शकणार? मटा ऑनलाईन पोलमध्ये 85 टक्के युजर्सचं एकमत, किशोरी पेडणेकर यावेळी…

मटा ऑनलाईन पोलमध्ये प्रश्न काय?

मुंबई महापालिकेच्या प्रभाग क्रमांक २ मध्ये कोण बाजी मारणार? असा प्रश्न मटाच्या ऑनलाईन पोलमध्ये विचारण्यात आला होता. भाजपकडून तेजस्वी घोसाळकर, ठाकरे गटाच्या धनश्री कोलगे, आणि मेनका गिरीश सिंह (काँग्रेस) यांच्यात लढत आहे. या निवडणुकीत कोण बाजी मारणार? असा प्रश्न मटा ऑनलाईनच्या यूट्यूब चॅनलवर विचारण्यात आला असता २४ तासांच्या कालावधीत जवळपास १ लाख ४२ हजारांहून अधिक युजर्सनी मतदान केले, तर दीडशेहून जास्त जणांनी कमेंट्समधून आपले मत मांडले आहे.
Raju Patil : उमेदवारी मागे घेणारा मनसेचा शिलेदार भाजपात, मोठा मित्रही लवकरच धक्का देणार? राजू पाटलांकडे भाजपचे अप्रत्यक्ष बोट

ऑनलाईन पोलचे निकाल काय?

ठाकरे गटाच्या धनश्री कोलगे यांच्या बाजूने ८१ टक्के म्हणजे जवळपास १ लाख १५ हजार नेटिझन्सनी मतदान केले आहे. तेजस्वी घोसाळकर (भाजप) यांना १३ टक्के म्हणजे अंदाजे १९ हजार जणांनी पाठिंबा दर्शवला आहे. तर मेनका गिरीश सिंह (काँग्रेस) यांना ६ टक्के म्हणजेच साधारण ८ हजार जणांनी मतं दिली आहेत.

आता महत्त्वाची गोष्ट ही, की ऑनलाईन पोलमधून महाराष्ट्र टाइम्सने केवळ नेटिझन्सच्या मताचा कौल घेतला आहे. या पोलमध्ये मतदान करणारे युजर्स हे मुंबई महापालिकेतील मतदार असतीलच, अशातील बाब नाही. किंबहुना मुंबईसह महाराष्ट्र आणि देश-परदेशातील नागरिकांनीही आपापली मतं नोंदवली आहेत. त्यामुळे हे निकाल प्रत्यक्ष मुंबई महापालिका निवडणुकांच्या निकालाचे प्रतिबिंब मानण्यासारखे नाही. केवळ ऑनलाईन जनतेचा कौल कुणाच्या बाजूने आहे, याचा अंदाज टीम मटा ऑनलाईनकडून घेण्यात येत आहे. प्रत्यक्ष निकाल आणि मटा ऑनलाईनचे यूट्यूब पोल यांच्यात मोठी तफावत किंवा उलटफेरही आढळू शकतो.