Eknath Shinde meets Dagdu Sakpal : मुंबई महापालिका निवडणूक अवघ्या काही दिवसांवर असताना या भेटीगाठींमुळे राजकीय वर्तुळात तर्कवितर्कांना उधाण आले आहे.
उपमुख्यमंत्री एकनाथ शिंदे यांनी माजी आमदार दगडू सकपाळ यांची भेट घेतल्यामुळे अनेक चर्चा सुरु झाल्या आहेत. दगडू सकपाळ यांची मुलगी रेश्मा सकपाळ ही प्रभाग क्र. 203 मधून मुंबई महापालिका निवडणूक लढवण्यास इच्छुक होती. मात्र पक्षाने रेश्मा सकपाळ हिला उमेदवारी नाकारून भारती पेडणेकर यांना उमेदवारी दिल्याने दगडू सकपाळ नाराज आहेत अशी चर्चा होती. मात्र माझ्या प्रकृतीची विचारपूस करण्यासाठी एकनाथ शिंदे आलेले होते दुसरं तिसरं काहीही नाही, असं स्पष्टीकरण सकपाळ यांनी दिलं आहे.
तर दुसरीकडे शिवडी विधानसभेतील प्रभाग क्र. 205 च्या उमेदवार सुप्रिया दळवी यांच्यासाठी आयोजित ठाकरेसेना-मनसेच्या संयुक्त मेळाव्याला शिवडीचे आमदार अजय चौधरी यांची अनुपस्थिति पाहायला मिळाली. मनसेला शिवडी विधानसभेत केवळ एक जागा मिळाली असताना देखील मनसेच्या उमेदवाराच्या मेळाव्याला स्थानिक आमदारांनी पाठ फिरवल्याने आश्चर्य व्यक्त केले जात आहे.
एकीकडे माजी आमदारांच्या घरी एकनाथ शिंदे तर दुसरीकडे विद्यमान आमदार अजय चौधरी ठाकरे बंधूंच्या युतीच्या मेळाव्याला अनुपस्थित राहिल्याने दबक्या आवाजात कुजबूज सुरु झाली आहे.
लेखकाबद्दलअनिश बेंद्रेअनिश सतीश बेंद्रे, महाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत आहेत. गेल्या तीन वर्षांपासून ते मटासोबत काम करत आहेत. राजकीय, गुन्हेगारी आणि मनोरंजन या विषयातील बातम्यांमध्ये त्यांचा विशेष हातखंडा आहे. ब्रेकिंग न्यूजसोबतच निवडणूक विषयक विश्लेषण करण्यात त्यांना अधिक रस आहे. त्यांनी झेविअर्स कॉलेजमधून मास कम्युनिकेशनचे पदव्युत्तर शिक्षण घेतले आहे. आतापर्यंत एबीपी माझा, टीव्ही9 मराठीसह पत्रकारिता क्षेत्रात 12 वर्षांहून अधिक काळचा अनुभव त्यांना आहे… आणखी वाचा