रविवारी त्यांच्या घरी चुलत्याचे वर्षश्राद्ध असल्याने नातेवाईक आणि पाहुण्यांसाठी जेवणाचा कार्यक्रम आयोजित करण्यात आला होता. दिवसभर पाहुण्यांची वर्दळ असल्याने कुटुंब थकलेले होते. रात्री सर्व आटपून दोन्ही कुटुंबे गाढ झोपेत होती. मध्यरात्री एक ते सव्वा एकच्या सुमारास अचानक पाच ते सहा अज्ञात दरोडेखोरांनी ग्यानबा राजपुरे यांच्या घराचा दरवाजा लाथा मारून तोडला. अचानक झालेल्या आवाजाने घरातील सर्वजण जागे झाले. ग्यानबा यांच्या आईने प्रतिकार करण्याचा किंवा ओरडण्याचा प्रयत्न केला असता, क्रूर दरोडेखोरांनी त्यांच्या छातीवर आणि गळ्यावर पाय देऊन त्यांना जमिनीवर दाबून धरले.

धाराशिवमध्ये ‘महायुती’त ठिणगी! तानाजी सावंतांचा भाजप आमदारावर जहरी वार; ‘प्रसाद म्हणून ड्रग्जची पुडी देतील’ म्हणत उडवला धुरळा

शस्त्राचा धाक आणि लूट

दरोडेखोरांकडे धारदार शस्त्रे होती. त्यांनी पती-पत्नीच्या कपाळाला शस्त्र टेकवून जीवे मारण्याची धमकी दिली आणि अंगावरील दागिने ओरबाडून घेतले. ग्यानबा यांच्या घरातून सोन्याचे दागिने आणि रोख रक्कम लंपास केल्यानंतर, चोरट्यांनी आपला मोर्चा शेजारीच राहणाऱ्या बाळू राजपुरे यांच्या घराकडे वळवला. तिथेही घरातील सदस्यांना मारहाण करून लूटमार करण्यात आली.

पोलीस तपास सुरू

या घटनेत दोन्ही कुटुंबातील सदस्यांना शारीरिक दुखापत झाली आहे. घटनेनंतर घाबरलेल्या अवस्थेत राजपुरे कुटुंबीयांनी अंभोरा पोलीस ठाणे गाठून तक्रार दाखल केली. पोलिसांनी तातडीने घटनास्थळाचा पंचनामा केला असून अज्ञात आरोपींविरुद्ध गुन्हा दाखल करण्यात आला आहे.

भरवस्तीत आणि घराचा दरवाजा तोडून आत घुसण्याच्या या धाडसी प्रकारामुळे ग्रामीण भागातील सुरक्षेचा प्रश्न पुन्हा एकदा ऐरणीवर आला आहे. पोलीस सध्या आरोपींच्या शोधासाठी विविध पथके तैनात करत असून पुढील तपास अंभोरा पोलीस करत आहेत.