मराठीच्या मुद्द्यावरून ‘ठाकरे बंधूं’ना लक्ष्य

नाशिकमध्ये भाजपच्या प्रचाराचा नारळ आज मोठ्या उत्साहात फोडण्यात आला. प्रदेशाध्यक्ष रवींद्र चव्हाण आणि मंत्री गिरीश महाजन यांच्या प्रमुख उपस्थितीत ‘विजय संकल्प मेळावा’ पार पडला. यावेळी बोलताना महाजन यांनी उद्धव आणि राज ठाकरे या दोघांवरही निशाणा साधला. “गेल्या २५ वर्षांपासून मराठी मराठीचा जप करून तुम्ही मराठी माणसासाठी नेमकं काय केलं? हे आता जनतेला चांगलंच समजलं आहे. मराठीच्या मुद्द्यावर एकत्र येऊन केवळ भूलथापा मारण्याचं काम सुरू आहे,” असा घणाघात महाजन यांनी केला.

१० महापालिकांमध्ये भाजपचाच महापौर!

गिरीश महाजन यांनी केवळ मुंबईच नव्हे, तर राज्यातील इतर महापालिकांबाबतही मोठा दावा केला आहे. ते म्हणाले की, “राज्यातील १० प्रमुख महापालिकांमध्ये एकाही ठिकाणी विरोधी पक्षाचा महापौर बसणार नाही. १६ तारखेला जेव्हा निकाल लागेल, तेव्हा विरोधकांना आपली जागा कळलेली असेल.” महापालिकांच्या निवडणुकीत विरोधकांचा सुपडा साफ होणार असल्याचा आत्मविश्वास त्यांनी यावेळी व्यक्त केला.

मुंबई महापालिकेत काय होणार?

मुंबई महापालिकेवर गेल्या अनेक दशकांपासून असलेल्या ठाकरेंच्या सत्तेला यंदा भाजपने सुरुंग लावण्याची पूर्ण तयारी केली आहे. महाजन यांच्या विधानाने हे स्पष्ट झाले आहे की, भाजपने मुंबईसाठी विशेष रणनीती आखली आहे. “मुंबईकरांना आता बदल हवा आहे आणि तो बदल मतपेटीतून दिसेल,” असेही त्यांनी स्पष्ट केले.

नाशिकमधील या मेळाव्यानंतर आता ठाकरे गटाकडून गिरीश महाजन यांच्या या ‘चपराक’ विधानाला काय प्रत्युत्तर मिळते, याकडे सर्वांचे लक्ष लागले आहे. मुंबईच्या सत्तेचा झेंडा कुणाच्या हाती जाणार, याचा फैसला आता काही दिवसांवरच येऊन ठेपला आहे.