“मी माझ्या उभ्या आयुष्यात अशी निवडणूक कधी पाहिली नाही”, असं वक्तव्य मनले अध्यक्ष राज ठाकरे यांनी मनसे नेते अविनाश जाधव, अभिजीत पानसे, राजू पाटील यांच्यासमोर केल्याची माहिती समोर आली आहे. “बाळासाहेब ठाकरे यांच्यासोबत अनेक निवडणुका पाहिल्या. पण 65 उमेदवार बिनविरोध होतात ही परिस्थिती पहिल्यांदाच पाहिली”, असं राज ठाकरे यांनी म्हटल्याची माहिती समोर येत आहे. मनसे नेते अविनाश जााधव यांनी याबाबत महत्त्वाची प्रतिक्रिया दिली.

‘मनसेच्या उमेदवाराला ऑफर, व्हिडीओ दाखवणार’

“राज ठाकरे यांनी कल्याण डोंबिवली, ठाण्यातील परिस्थिती समजून घेतली. मला वाटतं त्यांच्या भाषणात या सगळ्या गोष्टी येतीलच. आम्ही त्यांना काही पुरावे दिले आहेत. कोपरीत आमच्या उमेदवाराला ऑफर देण्यात आली. त्याचा व्हिडीओ आमच्याकडे आहे. मी राज ठाकरे यांना तो व्हिडीओ दाखवला आहे. काही गोष्टी आता समोर येतील. पण परत ते देखील म्हणाले की, अशी निवडणूक कधी पाहिली नाही, असं त्याचं वाक्य होतं. मी एवढे वर्ष बाळासाहेब ठाकरे यांच्याबरोबर तसेच आतापर्यंत निवडणूक पाहतोय, पण अशी निवडणूक पाहिली नाही की, निवडणुकाच होऊ द्यायची नाही. उमेदवारच विकत घ्यायचे हे आतपर्यंत घडलं नव्हतं. पण भाजप आणि शिवसेना आता या पातळीला उतरले आहेत”, अशी टीका अविनाश जाधव यांनी केली.”आम्ही उद्या निवडणूक आयुक्तांची भेट घेणार आहोत. त्यांना जे काही 64 ठिकाणी घडलेलं आहे त्याबाबत त्यांच्यासोबत पत्र व्यवहार करणार आहोत, म्हणजे आम्हाला कोर्टात जाण्याचा मार्ग मोकळा होईल. खरंतर त्यांनी आज जिल्हाधिकाऱ्यांना विचारलं आहे. ज्या उमेदवारांनी अर्ज मागे घेतले आहेत त्यांनी अर्ज मागे का घेतला? ते विचारा. आम्ही बिनविरोध निवडणुकीच्या विरोधात कोर्टात जाणार आहोत. लोकशाही जिवंत असेल तर नक्की परिणाम दिसून येईल. लोकं जिवंत असतील तर परिणाम दिसून येईल”, असं अविनाश जाधव म्हणाले.

“कसलं भरारी पथक, जे भरारी पथकात काम करतात ते कोण आहेत ते एकदा चेक करा. जिल्हाधिकारी किंवा महापालिकेत काम करणारी ती लोकं आहेत. जी पाच वर्षे त्या नगरसेवकाच्या दबावात काम करत असतात. ते भरारी पथक आहे. नवीन दिल्लीतून कोणतं पथक आलेलं नाही”, अशी प्रतिक्रिया अविनाश जाधव यांनी दिली.