पुणे, पिंपरी-चिंचवड महापालिका निवडणुकांसाठी दोन्ही राष्ट्रवादी काँग्रेसची आघाडी झालेली आहे. दोन्ही महापालिकांमध्ये त्यांच्या समोर भाजपचं आव्हान आहे. आज पुण्यात अजित पवारांची पत्रकार परिषद झाली. राष्ट्रवादी काँग्रेसच्या बॅनरवर शरद पवारांचा फोटो छापण्यात आला असल्यानं याबद्दल पत्रकारानं अजित पवारांना थेट प्रश्न विचारला. बॅनरवर शरद पवारांचा फोटो यापुढेही कायम राहणार का, असा प्रश्न अजित पवारांना विचारण्यात आला. त्यावर तुमच्या तोंडात साखर पडो, असं उत्तर अजित पवारांनी दिलं. त्यानंतर तिथे एकच हशा पिकला. अजित पवारांनी त्यांच्या विधानातून शरद पवारांच्या राष्ट्रवादी काँग्रेस सोबतची आघाडी यापुढेही कायम ठेवण्याचे संकेत दिले आहेत.
हॅलो उद्धव! शिंदेंचा थेट कॉल अन् प्रॉब्लेम सॉल्व्ह; शिवसेनेच्या उमेदवाराचा जीव भांड्यात पडला
पिंपरी-चिंचवडमध्ये राष्ट्रवादी काँग्रेसच्या गुलाबी बॅनरवर शरद पवारांचा फोटो दिसल्यानं अनेकांनी आश्चर्य व्यक्त केलं. त्यावर अजित पवारांनी केलेल्या विधानामुळे अनेक जण बुचकळ्यात पडले. यावर शरद पवारांच्या राष्ट्रवादी काँग्रेसचे प्रदेशाध्यक्ष शशिकांत शिंदे यांनी भाष्य केलं आहे. तीन-चार ठिकाणी आमची अजित पवारांच्या पक्षासोबत युती आहे. त्यामुळे त्यांच्या बॅनरवर शरद पवारांचा असेल, तर त्यातून काही वेगळा अर्थ काढण्याची गरज नाही, असं शशिकांत शिंदे म्हणाले.
जांगडगुत्ता! दोन जागा, दोन उमेदवार अन् चार एबी फॉर्म; चारही अर्ज वैध ठरल्यानं भलताच पेच
महापालिका निवडणुकीच्या निमित्तानं ठाकरे बंधू एकत्र आले आहेत. मग त्यांचे पक्षदेखील एक होणार का, अशी चर्चा होत नाही. राष्ट्रवादी काँग्रेसच्याच बाबतीत ती का होते, असा सवाल शिंदे यांनी विचारला. आमची आघाडी झालेली आहे. ही स्थानिक पातळीवरील आघाडी आहे. त्याचा वेगळा अर्थ काढू नका. पण भविष्यात काय होईल ते सांगता येत नाही, असं शिंदे यांनी म्हटलं.