भारतीय जनता पक्षाने फुलेनगर-नागपूर चाळ या प्रभागातून त्यांना उमेदवारी दिली होती. भाजप समर्थकांनी त्यांच्या उमेदवारीला विरोध करीत सोशल मीडियावर मोठ्या प्रमाणात टीका केली होती. अखेरीस भाजपने त्यांचा उमेदवारी अर्ज मागे घेऊन तेथील अपक्ष उमेदवाराला पुरस्कृत करण्याचा निर्णय घेतला आहे.

धनंजय जाधव, पूजा-जाधव-मोरे या दाम्पत्याने गुरुवारी उमेदवारी अर्ज मागे घेतल्यानंतर क्षेत्रीय कार्यालयाच्या बाहेर पडताच कार्यकर्त्यांनी त्यांना गराडा घातला होता. या वेळी अश्रू अनावर झालेल्या पूजा जाधव-मोरे यांनी त्यांना मिळालेली उमेदवारी आणि त्यांच्या विरोधात चाललेल्या सोशल मीडियावरील कॅम्पेनबाबत खुलासे केले.

त्या म्हणाल्या, ‘माझ्या आयुष्यात झालेल्या एका छोट्याशा चुकीचा खूप मोठा बाऊ करण्यात आला. माझ्याविरोधात जे काही षडयंत्र झाले, त्याच्या मला प्रचंड वेदना होत आहेत; परंतु मी लढणारी मुलगी आहे. मी यातून बाहेर पडणार. भारतीय जनता पक्षाने मला मोठ्या मनाने स्वीकारून उमेदवारीही दिली. मी पक्षाची विचारधारा पूर्णपणे समजून घेतली आहे.’

कोण आहेत पूजा जाधव मोरे?

संभाजीराजे छत्रपती यांच्या नेतृत्वाखालील महाराष्ट्र स्वराज्य पक्षाकडून पूजा जाधव यांना २०२४ च्या विधानसभेची गेवराई येथून उमेदवारी देण्यात आली होती. मूळच्या बीड येथील असलेल्या पूजा मोरे यांचा विवाह धनजंय जाधव यांच्याशी झाल्यानंतर त्या पुण्यात स्थायिक झाल्या आहेत. या दाम्पत्याने महापालिका निवडणूक लढविण्याच्या दृष्टीने गेल्या काही महिन्यांपासून जोरदार तयारी केली होती. त्यांनी जुलै महिन्यात पाच हजार किलो चिकनचे मोफत वाटप केल्यानंतर याची मोठ्या प्रमाणात चर्चा झडली होती.
Uddhav Thackeray : ठाकरेंचे एक-दोन नव्हे 82 उमेदवार बाद करण्याची खेळी, भाजपचा मोठा डाव उलटला, कारण ठरलं…

भाजपचे चार उमेदवार पुण्यात बॅकफूटवर

पुणे महापालिका सार्वत्रिक निवडणुकीतून गुरुवारी प्रभाग १ आणि २ मधून चार उमेदवारांनी अर्ज माघारी घेतले. फुलेनगर नागपूर चाळ प्रभाग क्रमांक २ मधील भाजपच्या अधिकृत उमेदवार पूजा धनंजय जाधव यांनी मंगळवारी माघार घेतली.

मागील काही महिन्यांपासून पूजा जाधव या प्रभाग क्रमांक १ मधून ओबीसी गटातून निवडणुकीची तयार करत होत्या. पण भाजपाने वंदना खांदवे यांना ओबीसी गटातून उमेदवारी दिली. त्यामुळे जाधव अस्वस्थ झाल्या होत्या. प्रभाग क्रमांक २ खुल्या गटातून अदिती बाबर यांनी उमेदवारी अर्ज भरला होता. पण अखेरच्या दिवशी धनंजय जाधव यांनी आयत्या वेळी भाजपकडून प्रभाग क्रमांक २ साठी ए बी फॉर्म मिळवत उमेदवारी अर्ज भरला. त्यामुळे भाजपच्या इच्छुक अदिती बाबर यांना अपक्ष उमेदवारी अर्ज भरावा लागला.
Devendra Fadnavis : निकालाआधीच विरोधकांचा ‘निकाल’! महायुतीने शंख फुंकला, विजयी उमेदवाराला फोन करत फडणवीस म्हणाले…
तर पूजा जाधव यांनी प्रभाग क्रमांक २ मधून खुल्या गटातून भाजपची अधिकृत उमेदवारी मिळवली. परंतु प्रभाग क्रमांक २ मधून बाहेरील व्यक्तीला उमेदवारी दिल्याने भाजपच्या गटात नाराजी होती. आता त्यांच्या माघारीनंतर अपक्ष रिंगणात उतरलेल्या भाजपच्या अदिती बाबर यांना पक्ष पाठिंबा देण्याची शक्यता आहे.