प्रभागात केवळ भाजप उमेदवाराचाच अर्ज

कल्याण डोंबिवली महापालिकेच्या १२२ जागांसाठी होणाऱ्या निवडणुकीत भाजपने दोन जागांवर मतदानापूर्वीच ‘कमळ’ फुलवले आहे. ‘प्रभाग १८ अ’मधून रेखा राजन चौधरी यांनी उमेदवारी अर्ज दाखल केला. मात्र अर्ज दाखल करण्याच्या अखेरच्या क्षणापर्यंत एकाही विरोधकाने त्यांच्याविरोधात उमेदवारी अर्ज दाखल केला नसल्याने चौधरी यांचा विजय निश्चित झाला आहे. तर पहिल्यांदाच निवडणुकीच्या रिंगणात उतरलेल्या आसावरी नवरे यांनीही विजयाचा गुलाल उधळला आहे.

कल्याण-डोंबिवलीत युतीत बंडखोरी

दरम्यान, कल्याण डोंबिवली महापालिकेच्या १५ जानेवारी रोजी होणाऱ्या निवडणुकीसाठी महायुतीचे मित्रपक्ष असलेल्या शिवसेनेच्या वाट्याला ६६, तर भाजपच्या वाट्याला ५६ जागा आल्या. मात्र इच्छुकांची मोठी यादी आणि सततचा पाठपुरावा या पार्श्वभूमीवर, मंगळवारी दुपारी १२ वाजल्यानंतर अखेरच्या क्षणी दोन्ही पक्षांमध्ये सर्वच प्रभागांत बंडखोरी उफाळून आली. अनेक प्रभागांत शिवसेना-भाजप समोरासमोर उभी ठाकल्याचे चित्र आहे.
Uddhav Thackeray : निष्ठेची किंमत उरली नाही, दिवंगत नेते ‘अनिलभैय्यां’च्या मुलाचा उद्धव ठाकरेंना जय महाराष्ट्र, पक्षप्रमुखांकडे…
अखेरच्या क्षणी उमेदवारी दिलेल्यांकडून ‘आपण सांगितल्यानंतर उमेदवारी मागे घेण्यास तयार आहोत,’ असे शपथपत्र घेण्यात आले आहे. हा एकमेकांवर दबाव वाढविण्याचा प्रयत्न असल्याचे बोलले जात आहे. तर दुसरीकडे, पक्षाचा अधिकृत उमेदवारी अर्ज मिळाल्यानंतर, उमेदवारांनी लगेचच प्रचाराला सुरुवात केली आहे. आपण अधिकृत उमेदवार असताना, माघार का घ्यायची, अशीच अधिकृत उमेदवारांची भूमिका आहे. त्यामुळे माघारीच्या दिवशी अनेक उमेदवार गायब होण्याची शक्यता व्यक्त होत आहे.

एखाद्या प्रभागातून अपक्ष उमेदवाराने किंवा बंडखोरांनी उमेदवारी मागे घेतली नाही, तर त्या बदल्यात दुसऱ्या प्रभागात विरोधकांना खिंडीत गाठण्याचा प्रयत्न महायुतीच्या मित्र पक्षांकडून होणार, हे निश्चित आहे. बंडखोरांना अडकविण्यासाठी ‘बी प्लान’ तयार असल्याचे पक्षांच्या नेत्यांचे म्हणणे आहे.
BMC Election : बालेकिल्ल्यातच ठाकरे बंधूंची कसोटी, आदित्य ठाकरेंच्या मतदारसंघात बंडोबा, तर अमित ठाकरे ‘पडले’ तिथे चक्क…

कुठे आनंदाश्रू; कुठे वेदना

शिवसेना आणि भाजपमधून निवडणूक लढवण्यासाठी अनेक जण इच्छुक होते. मात्र पक्षांनी अनेक ठिकाणी नव्या चेहऱ्यांना संधी देण्याचे धोरण स्वीकारले. दोन-तीन दिवसांपासून वरिष्ठांच्या कार्यालयात घिरट्या घातल्यानंतर, तिकिटाचे दान पदरात पडलेले इच्छुकही हेलावून गेले.