मध्यरात्रीचा गेम आणि निष्ठावंतांना डावलले

राजकीय वर्तुळात चर्चा आहे की, वॉर्ड क्रमांक १९२ मधून शिंदेंच्या शिवसेनेचे विधानसभा प्रमुख कुणाल वाडेकर हे निवडणूक लढवण्यासाठी प्रबळ इच्छुक होते. मात्र, ऐन मध्यरात्री पक्षात प्रवेश केलेल्या प्रीती पाटणकर यांना मुख्यमंत्री एकनाथ शिंदे यांनी उमेदवारी जाहीर केली. यामुळे वर्षानुवर्षे पक्षासाठी झटणाऱ्या कुणाल वाडेकर यांना डावलण्यात आल्याची भावना कार्यकर्त्यांमध्ये निर्माण झाली आहे.Mercedes Car Crash Mumbai: कोस्टल रोडवर मर्सिडीजचा भीषण थरार! सुसाट कार थेट खांबावर धडकली, पाठोपाठ दोन टॅक्सींचाही… नेमकं काय घडलं?

बड्या पदाधिकाऱ्यांचा आक्रमक पवित्रा

प्रीती पाटणकर यांच्या उमेदवारीची घोषणा होताच दादरमधील शिंदे गटाच्या गोटात खळबळ उडाली आहे. विधानसभा प्रमुख कुणाल वाडेकर यांच्यासह उपविभाग प्रमुख निकेत पाटील आणि शाखाप्रमुख अभिजित राणे यांनी आपली तीव्र नाराजी व्यक्त केली आहे. केवळ नेतेच नव्हे, तर १९२ मधील संपूर्ण शाखेतील पदाधिकारी आणि कार्यकर्ते आता सामूहिक राजीनामा देण्याच्या तयारीत असल्याची माहितीही समोर येत आहे.

मनसेच्या यशवंत किल्लेदारांशी होणार लढत

दरम्यान, वॉर्ड क्रमांक १९२ मध्ये महाराष्ट्र नवनिर्माण सेनेने (मनसे) यशवंत किल्लेदार यांना मैदानात उतरवले आहे. अशा बलाढ्य उमेदवारासमोर अनुभवी आणि स्थानिक चेहरा देण्याऐवजी आयात केलेल्या उमेदवाराला संधी दिल्याने शिंदे गटाला याठिकाणी मोठे नुकसान सोसावे लागण्याची शक्यता राजकीय विश्लेषक वर्तवत आहेत.

शिंदे काय तोडगा काढणार?

शिवसेनेत पडलेल्या फुटीनंतर दादरसारख्या महत्त्वाच्या बालेकिल्ल्यात अंतर्गत बंडाळी होणे हे शिंदे गटासाठी धोक्याची घंटा मानली जात आहे. नाराज पदाधिकाऱ्यांची मनधरणी करण्यासाठी वरिष्ठ पातळीवरून प्रयत्न होणार की, कार्यकर्त्यांच्या नाराजीचा फटका निवडणुकीत बसणार? याकडे सर्वांचे लक्ष लागले आहे.