मर्सिडीज थेट खांबावर आदळली!

मिळालेल्या माहितीनुसार, हा अपघात वरळी येथील नमन इमारतीसमोर कोस्टल रोडच्या उत्तर दिशेकडील मार्गावर घडला. दुपारच्या सुमारास एक मर्सिडीज कार सुसाट वेगाने जात असताना अचानक चालकाचे कारवरील नियंत्रण सुटले. नियंत्रण सुटलेली ही आलिशान कार रस्त्या कडेला असलेल्या विद्युत खांबावर जोरात जाऊन आदळली. हा आघात इतका भीषण होता की कारच्या पुढच्या भागाचे प्रचंड नुकसान झाले.

एकामागून एक दोन टॅक्सी भिडल्या

मर्सिडीजचा अपघात घडताच मागून येणाऱ्या वाहनचालकांची त्रेधातिरपीट उडाली. मर्सिडीजने अचानक घेतलेल्या वळणामुळे आणि धडकेमुळे मागून येणाऱ्या दोन टॅक्सींना स्वत:ला सावरता आले नाही आणि त्या एकमेकींवर जोरात आदळल्या. काही क्षणातच कोस्टल रोडवर गाड्यांच्या काचांचा खच पडला आणि प्रवाशांमध्ये भीतीचे वातावरण पसरले.

BMC Election 2026: मध्यरात्री प्रवेश, तासाभरात उमेदवारी; दादरमध्ये ठाकरे बंधूंना रोखण्यासाठी शिंदेंचा मोठा डाव, पण निष्ठावंतांचा….

ब्रीच कँडी रुग्णालयात उपचार सुरू

या अपघातात मर्सिडीजमधील एका महिला प्रवाशाच्या डाव्या खांद्याला गंभीर दुखापत झाली आहे. त्यांना तातडीने उपचारासाठी जवळच्या ब्रीच कँडी रुग्णालयात हलवण्यात आले. तसेच, टॅक्सी चालकालाही किरकोळ दुखापत झाली असून त्यांच्यावर प्रथमोपचार करण्यात आले आहेत. सुदैवाने या भीषण अपघातात कोणतीही जीवितहानी झालेली नाही.

वाहतुकीचा खोळंबा आणि पोलिसांची धाव

अपघाताची माहिती मिळताच कोस्टल रोडचे आपत्कालीन पथक आणि पोलीस घटनास्थळी दाखल झाले. अपघातग्रस्त वाहने रस्त्याच्या मधोमध असल्याने वाहतुकीत अडथळा निर्माण झाला होता. पथकाने क्रेनच्या साहाय्याने मर्सिडीज आणि दोन्ही टॅक्सी बाजूला केल्या. त्यानंतर सुमारे तासाभराने या मार्गावरील वाहतूक पुन्हा सुरळीत सुरू झाली.

कोस्टल रोडवर वेगमर्यादेचे उल्लंघन केल्यामुळे हे अपघात घडत असल्याचे प्राथमिक दर्शनी दिसत असून, पोलीस या प्रकरणाचा अधिक तपास करत आहेत.