मुंबई महापालिकेच्या प्रभाग क्रमांक १९२ वरुन नाराजीनाट्य सुरु झालं आहे. हा प्रभाग युतीत मनसे कडे गेला आहे. मनसेनं इथून यशवंत किल्लेदार यांना उमेदवारी दिली आहे. ते मनसे प्रमुख राज ठाकरे यांचे निकटवर्तीय आहे. ही जागा मनसेला सुटल्यानं स्थानिक पातळीवर शिवसेना उबाठामध्ये नाराजी आहे. माजी नगरसेविका प्रिती पाटणकर आणि प्रकाश पाटणकर नाराज आहेत. दोघेही उपमुख्यमंत्री एकनाथ शिंदे यांच्या शिवसेनेत प्रवेश करणार आहेत. आज संध्याकाळी त्यांचा पक्षप्रवेश होईल अशी माहिती आहे.
माझी हकालपट्टी करा! शिंदेंच्या होमग्राऊंडवर शिंदेच नाराज; पत्रातील ठसठशीत शब्दांनी लक्ष वेधलं
उपमुख्यमंत्री एकनाथ शिंदे यांच्या उपस्थितीत नंदनवन बंगल्यावर पाटणकर यांचा पक्षप्रवेश संपन्न होईल. विशेष म्हणजे किल्लेदार यांना उमेदवारी जाहीर झाल्यानं मनसेमध्येही नाराजी आहे. किल्लेदार यांना तिकीट मिळताच मनसेच्या सरचिटणीस स्नेहल जाधव यांनी राजीनामा दिला आहे. तिकीट देताना पक्षानं विचारात घेतलं नाही, अशी त्यांची तक्रार आहे. त्यामुळे प्रभाग क्रमांक १९२ मध्ये नाराजीनाट्य पाहायला मिळत आहे.

बंडखोरीचा धोका असल्यानं ठाकरे बंधूंनी सावध पवित्रा घेतला आहे. शिवसेना उबाठा आणि मनसे यांच्याकडून उमेदवारांची अधिकृत घोषणा करण्यात आलेली नाही. दोन्ही पक्षांनी उमेदवारांची यादी प्रसिद्ध केलेली नाही. जागावाटप पूर्ण झाल्यानं त्यांनी आपापल्या वाट्याला आलेल्या प्रभागांमधील निश्चित झालेल्या उमेदवारांशी संपर्क साधला आहे. तिकीट नक्की झालं आहे. अर्ज भरण्यास तयार राहा, असे संदेश मातोश्री आणि शिवतीर्थवरुन गेलेले आहेत.