नवनाथ बन हे भारतीय जनता पक्षाचा मुंबईतील प्रमुख चेहरा मानला जातात. विशेषतः शिवसेना (उद्धव बाळासाहेब ठाकरे) पक्षाचे राज्यसभा खासदार संजय राऊत यांच्या सणसणीत टीकेला नवनाथ बन यांच्याकडून सडेतोड उत्तर दिले जाते.

प्रभाग क्रमांक १३५ मध्ये घाटकोपरमधील भटवाडी, किरोल व्हिलेज, नारायणनगर या भागांचा समावेश होतो. मागील निवडणुकीत म्हणजे २०१७ मध्ये या वॉर्डातून शिवसेनेच्या समिक्षा साखरे यांनी बाजी मारली होती. त्यावेळी त्यांनी काँग्रेस उमेदवार निर्मला सिंह याचा पराभव केला होता. यंदा भारतीय जनता पक्ष नवनाथ बन यांच्या पाठीशी संपूर्ण ताकद लावताना दिसेल.

कोण आहेत नवनाथ बन?

राजकारणात येण्यापूर्वी नवनाथ बन यांनी पत्रकारितेत दीर्घकाळ काम केले आहे. त्यांनी एका आघाडीच्या वृत्तवाहिनीमध्ये सुमारे १३ वर्षे काम केले आहे. पत्रकारिता करत असताना राजकारणाची गोडी लागली, राजकीय घडामोडींची त्यांना सखोल जाण आहे. अशातच जानेवारी २०२३ मध्ये त्यांनी तत्कालीन उपमुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला होता. पक्षप्रवेशानंतर लगेचच त्यांची भाजपच्या महाराष्ट्र प्रदेश माध्यम प्रमुखपदी नियुक्ती करण्यात आली.
BMC Election : काँग्रेसचे प्राबल्य असलेल्या जागा ‘वंचित’ला, मुख्यालय असलेला प्रभागही सोडला, बड्या नेत्यांची नाराजी
सध्या ते भाजपचे एक आक्रमक प्रवक्ते म्हणून ओळखले जातात. नवनाथ अनेकदा संजय राऊत, उद्धव ठाकरे आणि महाविकास आघाडीतील इतर नेत्यांच्या टीकेला उत्तर देताना दिसतात. ते भाजपच्या वतीने नियमितपणे पत्रकार परिषदा घेतात आणि सोशल मीडियातून पक्षाची भूमिका मांडतात. त्यांनी ‘बटोगे तो कटोगे’ या प्रचार घोषणेचे समर्थन करत विरोधकांवर टीका केली होती.ते मूळचे नांदेड जिल्ह्यातील असून सध्या मुंबईत राहतात.