भाजपला पाडलं एकटं

सोलापूर महानगरपालिकेत भाजपने यापूर्वीच ‘अब की बार ७५ पार’ असा नारा दिला होता. मात्र, भाजपने युतीबाबत कोणताही ठोस प्रस्ताव दिला नसल्याने आणि त्यांच्या हालचाली स्वतंत्र लढण्याच्या दिशेने असल्याने शिवसेना आणि राष्ट्रवादीने ही नवीन आघाडी केली आहे. राष्ट्रवादीचे नेते वसीम बुऱ्हाण यांनी यावर स्पष्ट प्रतिक्रिया दिली आहे. “भाजपने आमच्याकडे युतीचा कोणताही प्रस्ताव पाठवला नाही. त्यांच्या हालचाली पाहता आम्ही स्वतंत्र आणि खंबीर पाऊल उचलण्याचे ठरवले आहे. सोलापुरात आता शिवसेना आणि राष्ट्रवादी काँग्रेसची सत्ता येईल आणि आमचाच महापौर खुर्चीवर बसेल,” असा ठाम विश्वास बुऱ्हाण यांनी व्यक्त केला.

जागावाटपाचा ५१-५१ फॉर्म्युला आणि इच्छुक उमेदवारांची गर्दी

सोलापूर महानगरपालिकेच्या एकूण १०२ जागांसाठी ही निवडणूक पार पडणार आहे. या निवडणुकीत शिवसेना आणि राष्ट्रवादीने प्रत्येकी ५१-५१ जागा लढवण्याचा निर्णय घेतला आहे. या ५१-५१ च्या फॉर्म्युल्यामुळे दोन्ही पक्षांना समान संधी मिळणार आहे. वसीम बुऱ्हाण यांनी दिलेल्या माहितीनुसार, राष्ट्रवादी काँग्रेसकडे इच्छुक उमेदवारांचा ओघ मोठा आहे. १०२ जागांसाठी जवळपास ४०० ते ५०० कार्यकर्त्यांनी उमेदवारी अर्ज दाखल केले आहेत.

विकासासाठी एकत्र आल्याचा दावा

ज्याप्रमाणे राज्याच्या विकासासाठी अजित पवार महायुतीत सहभागी झाले, त्याच धर्तीवर सोलापूर शहराच्या सर्वांगीण विकासासाठी एकनाथ शिंदे आणि अजित पवार यांच्या नेतृत्वाखालील दोन्ही पक्ष एकत्र आले आहेत, असे शिवसेना आणि राष्ट्रवादीच्या नेत्यांनी स्पष्ट केले आहे. या नव्या युतीमुळे भाजपसमोर मोठे आव्हान निर्माण झाले असून, सोलापूरच्या निवडणुकीत आता रंगत वाढली आहे.