नेमकं काय घडलं?

पुणे महापालिका निवडणुकांच्या पार्श्वभूमीवर राष्ट्रवादीच्या दोन्ही गटांमधील वाटाघाटी फिसकटल्याची चर्चा आहे. त्यानंतर काल रात्री उशिरा शरद पवार यांच्या नेतृत्वातील राष्ट्रवादीची महाविकास आघाडीसोबत बैठक पार पडली. ही बैठक अहोरात्र जवळपास चार ते पाच तास चालली. आज सकाळी अजित पवार कोणत्याही पोलीस संरक्षण किंवा ताफ्याशिवाय एकटेच बारामती हॉस्टेलमधून बाहेर पडले. त्यामुळे ते नेमके कुठे गेले, हा प्रश्न निर्माण झाला आहे. दोन्ही राष्ट्रवादी गट एकत्र येण्याची चर्चा अयशस्वी ठरल्यानंतर अजित पवार बारामती हॉस्टेलमधून एकटेच बाहेर पडले. ते जिजाई बंगल्यावर पोहोचले असल्याची शक्यता आहे. कारण ज्या गाडीतून ते निघाले होते, ती गाडी जिजाई बंगल्यात दिसली आहे. त्यामुळे अजित पवार जिजाई बंगल्यातच असण्याची शक्यता असली, तरी दादांचं दर्शन न घडल्याने तर्कवितर्क सुरुच आहेत.
BMC निवडणुकीत ठाकरे बंधू की सेना-भाजप महायुतीचा झेंडा? मटा ऑनलाईन पोलमध्ये 82 टक्के युजर्सचं एकमत, मुंबईत फक्त…

दोन्ही राष्ट्रवादींची बोलणी फिस्कटली

दरम्यान, महापालिका निवडणुकीसाठी दोन्ही राष्ट्रवादी एकत्र येण्याच्या चर्चेला शुक्रवारी वेगळे वळण मिळाले. जागावाटपाचे सूत्र आणि चिन्ह यांचा तिढा न सुटल्याने दोन्ही राष्ट्रवादी एकत्र येण्याची चर्चा फिस्कटल्याचे समजते. त्यामुळे शुक्रवारी रात्री पुन्हा महाविकास आघाडीच्या मूळ घटकपक्षांनी एकत्र येत निवडणूक लढविण्याविषयी चर्चा सुरू केली आहे. त्यामुळे पुण्याच्या निवडणुकीचे संभाव्य चित्र बदलण्याची शक्यता आहे.

राष्ट्रवादी काँग्रेस पक्ष आणि राष्ट्रवादी काँग्रेस शरदचंद्र पवार पक्ष यांच्यात शुक्रवारी दुपारी चर्चा सुरू होती. जागावाटपाविषयी व अन्य चर्चांसाठी राष्ट्रवादी शरदचंद्र पवार पक्षातर्फे प्रवक्ते अंकुश काकडे, माजी खासदार वंदना चव्हाण आणि स्थायी समितीचे माजी अध्यक्ष विशाल तांबे हे अजित पवारांच्या भेटीसाठी गेले होते. या वेळी अजित पवार यांच्यासह राष्ट्रवादी काँग्रेसचे प्रमुख पदाधिकारीही उपस्थित होते. मात्र, या बैठकीत अजित पवारांकडून सर्व उमेदवारांनी पक्षाच्या घड्याळ या चिन्हावरच लढावे, अशी अट घातली गेली. त्याचबरोबर राष्ट्रवादी शरदचंद्र पवार पक्षाला ३५ जागाच देण्याचा प्रस्तावही राष्ट्रवादी काँग्रेसकडून देण्यात आल्याची माहिती सूत्रांनी दिली.
Pune News : प्रशांत जगतापांची सोडचिठ्ठी, पवारांच्या NCP चे नवे पुणे शहराध्यक्ष कोण? दोघांची नावं चर्चेत, एकाचा नकार
हा प्रस्ताव मान्य होणे शक्यच नसल्याने ही बोलणी फिस्कटली आणि राष्ट्रवादी शरदचंद्र पवार पक्षाचे पदाधिकारी तेथून बाहेर पडले. यानंतर चक्रे फिरली आणि राष्ट्रवादी काँग्रेस शरदचंद्र पवार पक्षातर्फे काँग्रेसशी संपर्क साधला. तसेच शिवसेनेच्या (उद्धव बाळासाहेब ठाकरे) पक्षाच्या नेत्यांशीही चर्चा झाली. त्यानुसार रात्री उशिरापर्यंत ही बैठक सुरू होती.