भाजपकडून पुण्यात शिवसेनेला केवळ 15 जागांचा प्रस्ताव देण्यात आल्याची चर्चा आहे. यामुळे शिवसेना नेत्या नीलम गोऱ्हे यांनी नाराजी व्यक्त केली आहे. तसेच नाराज शिवसैनिकांनी आज नीलम गोऱ्हे यांच्या घराबाहेर आंदोलनदेखील केलं आहे. गोऱ्हे यांनी भाजपला 60 जागांचा प्रस्ताव पाठवल्याची देखील माहिती आहे. या सगळ्या घडामोडींदरम्यान शिवसेनेचा आणखी एक बडा नेता पुण्यात महायुतीसाठी प्रयत्न करत आहे. ते नेते म्हणजे राज्याचे उद्योगमंत्री उदय सामंत. पुण्यात भाजप आणि शिवसेनेच्या जागावाटपाचा तिढा शोडवण्यासाठी आज महत्त्वाच्या हालचाली घडल्या आहेत.

पुण्यातील भाजपचे निवडणूक प्रमुख गणेश बिडकर यांची शिवसेनेचे मंत्री उदय सामंत आणि माजी खासदार राहुल शेवाळे यांच्यात चर्चा झाली आहे. पुण्यातील भाजप-शिवसेना युतीच्या चर्चा अंतिम टप्प्यात आहेत. निलम गोऱ्हे यांनी काल 60 उमेदवारांना तयारी करण्याचे आदेश दिले होते. त्यानंतर आज स्वतः उदय सामंत यांनी ‘वर्षा’ बंगल्यावर जात युतीच्या जागा वाटपावर अंतिम तोडगा काढण्यासाठी मुख्यमंत्र्यांची भेट घेतली. त्यामुळे आता अंतिम तोडगा निघतो का? ते पाहणं महत्त्वाचं आहे. भाजपकडून सन्मानपूर्वक जागा मिळाल्या नाहीत तर शिवसेना आपला प्लॅन B सक्रीय करणार असल्याचीदेखील चर्चा आहे.

शिवसेनेचा प्लॅन B काय?

पुण्यातून महायुतीतील सर्वात मोठी बातमी समोर आली आहे. भाजपसोबत महायुतीच्या जागावाटपाची चर्चा फिस्कटल्यानंतर शिवसेना आपला प्लॅन B नुसार, पुण्यात उपमुख्यमंत्री अजित पवार यांच्या राष्ट्रवादी काँग्रेस पक्षासोबत युतीची चाचपणी सुरु करणार असल्याची माहिती आहे. विशेष म्हणजे दोन्ही पक्षांमध्ये संवाद सुरू असल्याची माहिती आहे. भाजप शिवसेनेला सन्मानजनक जागा द्यायला तयार नाही. त्यामुळे राष्ट्रवादीकडून शिवसेनेसोबत चर्चा सुरू असल्याची माहिती आहे. पुण्यातील शिवसेनेचा एक मोठा नेता यासंदर्भात प्रस्ताव घेऊन एकनाथ शिंदे यांच्या भेटीला गेल्याची माहिती आहे. अजित पवारांची राष्ट्रवादी आणि एकनाथ शिंदे यांची शिवसेना पुणे महानगर पालिका एकत्र लढवण्यासंदर्भात चर्चा पडद्यामागे सुरु असल्याची माहिती सूत्रांकडून मिळत आहे.