राष्ट्रवादी काँग्रेस आणि राष्ट्रवादी काँग्रेस शरदचंद्र पवार हे दोन्ही पक्ष एकत्र येण्याबाबत दोन्ही पक्षांच्या प्रमुख नेत्यांची सोमवारी (२२ डिसेंबर) रात्री आणि मंगळवारी (२३ डिसेंबर) सकाळी बैठक झाली. बारामती हॉस्टेलमध्ये उपमुख्यमंत्री अजित पवार यांनी पुणे आणि पिंपरी-चिंचवडमधील राष्ट्रवादी काँग्रेसच्या प्रमुख पदाधिकाऱ्यांशी याबाबत चर्चा केली.

महापालिका निवडणुकीसाठी महाविकास आघाडीमध्ये दोन्ही ‘राष्ट्रवादी’ एकत्र येणार असल्याची चर्चा गेल्या काही दिवसांपासून सुरू आहे. स्थानिक पातळीवरील नेत्यांनीही आघाडी करण्यास सकारात्मकता दर्शविली आहे. मात्र, राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप यांनी या आघाडीस विरोध केला असून, त्यांनी पक्षाकडे राजीनामा सादर केला आहे. ‘आघाडीचा निर्णय स्थानिक परिस्थितीनुसार घेतला जाईल. शहराध्यक्षांनी समन्वय साधून महापालिका निवडणुकीसाठी आघाडीचा निर्णय घ्यावा,’ असे सांगून अजित पवार यांनी दोन दिवसांपूर्वी दोन्ही राष्ट्रवादींच्या आघाडीचे संकेत दिले होते. त्यानंतर दोन्ही पक्षांत घडामोडींना वेग आला आहे.
Pune News : हर्षवर्धन पाटलांची ‘झोप’ उडाली, साखर कारखान्याला 11 कोटींचा दंड, राष्ट्रीय सहकारी साखर कारखाना महासंघाचे अध्यक्षच कात्रीत
‘दोन्ही राष्ट्रवादींनी एकत्र लढण्याचे निश्चित केले आहे. जागावाटपाचे सूत्र लवकरच निश्चित होणार आहे. प्रसंगी काही जागांबाबत तडजोड केली जाईल. आघाडी करण्याबाबतचा निर्णय उपमुख्यमंत्री अजित पवार दोन दिवसांमध्ये जाहीर करतील,’ असे राष्ट्रवादी काँग्रेसचे शहराध्यक्ष सुभाष जगताप यांनी मंगळवारी पत्रकारांना सांगितले.
Satara News : मेधा कुलकर्णींचा अमित शाहांकडे पाठपुरावा, भाजपचाच बडा नेता अडचणीत, धाकटा भाऊ ईडीच्या ताब्यात, पश्चिम महाराष्ट्रात खळबळ
काँग्रेस, राष्ट्रवादी काँग्रेस शरदचंद्र पवार पक्ष आणि शिवसेना उद्धव बाळासाहेब ठाकरे हे तीन पक्ष महाविकास आघाडी म्हणून महापालिका निवडणूक लढवणार असल्याचे यापूर्वीच निश्चित झाले होते. मात्र, आता दोन राष्ट्रवादींची आघाडी; तसेच शिवसेना उद्धव बाळासाहेब ठाकरे आणि महाराष्ट्र नवनिर्माण सेनेची युती यामुळे महाविकास आघाडी, राष्ट्रवादी काँग्रेस आणि मनसे अशी आघाडी होणार का, याकडे राजकीय वर्तुळाचे लक्ष लागले आहे.

दोन्ही ‘राष्ट्रवादीं’ची आघाडी करताना चिन्हावरून संभ्रम वाढला आहे. दोन्ही पक्षांच्या इच्छुकांनी ‘राष्ट्रवादी’च्या ‘घड्याळ’ चिन्हावर निवडणूक लढवावी, असा आग्रह राष्ट्रवादी काँग्रेसकडून धरण्यात आला आहे. मात्र, त्याला राष्ट्रवादी काँग्रेस शरदचंद्र पवार पक्षातील काहींचा विरोध आहे. घडाळ्यावर निवडणूक लढल्यास अजित पवारांच्या राष्ट्रवादीत प्रवेश केल्यासारखे होईल. त्याऐवजी ‘तुतारी वाजविणारी व्यक्ती’ या चिन्हावर निवडणूक लढवावी, असा मतप्रवाह आहे. दरम्यान, सर्व उमेदवार हे घड्याळाच्याच चिन्हावर निवडणूक लढवतील, अशी स्पष्ट भूमिका अजित पवार यांनी घेतल्याचे समजते.