या मेट्रो मार्गिकेला ऑगस्ट 2024 मध्येच मंजुरी देण्यात आली होती. पंतप्रधान नरेंद्र मोदी यांनी ठाणे अंतर्गत रिंग मेट्रो रेल प्रोजेक्ट कॉरिडोरला मान्यता दिली होती. ठाणे शहरातील शहरी वाहतूक सुधारण्यासाठी आणि रस्त्यांवरील वाहतूक कोंडी कमी करण्याच्या उद्देशाने ही वर्तुळाकार मेट्रो लाईन उभारण्यात येत आहे.

Pune Metro : पुणेकरांचा प्रवास अधिक सुखकर, हिंजवडी ते शिवाजीनगर मेट्रो लवकरच सुरू; कसा असेल 23 किमीचा मार्ग?

कुठून-कुठे जोडणार?

हा प्रकल्प 29 किलोमीटर लांबीचा मेट्रो कॉरिडॉर असेल, जो ठाणे जंक्शनपासून सुरू होऊन पुन्हा तिथेच संपेल आणि पूर्ण वर्तुळाकार (रिंग) मार्ग तयार करेल. या मार्गावर वागळे इस्टेट, मानपाडा, वाघबीळ, बाळकुम, कोळशेत, साकेत, डोंगरीपाडा, नौपाडा आणि हिरानंदानी इस्टेट यांसारख्या प्रमुख निवासी व व्यावसायिक परिसरांना जोडण्यात येणार आहे.

या रिंग मेट्रोमध्ये एकूण 22स्थानके असतील. यामध्ये 20उन्नत (एलिव्हेटेड) स्थानके आणि २ भूमिगत स्थानके असणार आहेत. जुने आणि नवीन ठाणे रेल्वे स्थानक येथे भूमिगत मेट्रो स्थानके उभारली जातील. तसेच डॉ. काशिनाथ घाणेकर नाट्यगृह, मानपाडा, डोंगरीपाडा, विजय नगरी, वाघबीळ आणि वॉटरफ्रंट येथे उन्नत मेट्रो स्थानके असतील.

या मेट्रो मार्गिकेमुळे ठाणे शहरांतर्गत प्रवास अधिक वेगवान होणार आहे. यासोबतच ही रिंग मेट्रो मुंबई मेट्रो लाईन 4आणि लाईन 5 ला जोडली जाणार आहे. त्यामुळे मुंबई, ठाणे आणि कल्याणसारख्या महत्त्वाच्या शहरांमध्ये थेट मेट्रो जोडणी उपलब्ध होणार आहे.

कधी होणार सुरू?

मुंबई मेट्रो लाईन 4 शी ही मेट्रो राईला देवी आणि डोंगरीपाडा येथे जोडली जाणार असून, लाईन 5 शी बाळकुम नाक्याजवळ जोडणी होणार आहे. तसेच ठाणे जंक्शनलाही या मेट्रोची थेट जोड मिळणार आहे. दरम्यान, डिसेंबर 2025 मध्ये या प्रकल्पासाठी टेंडर प्रक्रिया सुरू झाली असून, 2026 ते 2028 या कालावधीत पहिल्या टप्प्यातील काम पूर्ण होण्याची अपेक्षा आहे. संपूर्ण रिंग मेट्रो 2029 पर्यंत सुरू होण्याची शक्यता वर्तवली जात आहे.