Beed Accident News: बीडमध्ये एका भीषण अपघातात एका व्यक्तीचा मृत्यू झाला आहे. स्कॉर्पिओने दिलेल्या धडकेत या व्यक्तीचा मृत्यू झाला. या घटनेने संपूर्ण गावात शोककळा पसरली आहे.
मिळालेल्या माहितीनुसार, वाणगाव येथील रहिवासी असलेले खाजाभाई सुलतान सय्यद हे आपल्या दुचाकीवरून प्रवास करत होते. मांजरसुंबा-नेकनूर दरम्यान रस्त्यावर जात असताना, पाठीमागून अतिशय वेगात येणाऱ्या एका स्कॉर्पिओ चालकाचे आपल्या वाहनावरील नियंत्रण सुटले. या भरधाव स्कॉर्पिओने खाजाभाई यांच्या दुचाकीला मागून जोराची धडक दिली. धडक इतकी भीषण होती की खाजाभाई यांचा जागीच प्राण गेला.
वाणगाव गावावर शोककळा
खाजाभाई सय्यद यांच्या निधनाची बातमी वाणगाव परिसरात वाऱ्यासारखी पसरली. त्यांच्या निधनामुळे संपूर्ण गावावर शोककळा पसरली आहे. खाजाभाई यांच्या पश्चात त्यांची पत्नी, एक मुलगा आणि एक मुलगी असा मोठा परिवार आहे. घराचा आधारवड गेल्याने सय्यद कुटुंबावर दुःखाचा डोंगर कोसळला आहे. आज शोकाकुल वातावरणात वाणगाव येथे त्यांच्यावर दफनविधी करण्यात आला.
वाहतूक सुरक्षेचा प्रश्न ऐरणीवर
अपघाताची माहिती मिळताच पोलिसांनी तात्काळ घटनास्थळी धाव घेत पंचनामा केला. मात्र, या घटनेमुळे महामार्गावरील वाढत्या अपघातांचा आणि बेशिस्त वाहतुकीचा प्रश्न पुन्हा एकदा समोर आला आहे. महामार्गावर वाहने चालवताना वेगावर मर्यादा पाळली जात नसल्याने असे जीवघेणे अपघात घडत आहेत अशा भरधाव आणि बेजबाबदार वाहन चालकांवर कडक कायदेशीर कारवाई करावी, अशी मागणी ग्रामस्थांनी केली आहे. खाजाभाई सय्यद यांच्या निधनाने एका हसत्याखेळत्या कुटुंबाचा आधार हिरावला गेला असून, महामार्गावर मृत्यूचे तांडव कधी थांबणार, असा सवाल उपस्थित केला जात आहे.
लेखकाबद्दलनुपूर उप्पलनुपूर विकास उप्पल, महाराष्ट्र टाइम्स ऑनलाईनमध्ये सिनियर डिजिटल कंटेंट प्रोड्युसर पदावर कार्यरत आहेत.गेल्या तीन वर्षांपासून महाराष्ट्र टाइम्स ऑनलाईनसोबत काम करत आहे. राष्ट्रीय, गुन्हेगारी, राजकीय, हटके स्टोरीज या विषयांचं लिखाण करण्यात हातखंडा आहे. घटनेचं विश्लेषणात्मक लिखाण करण्यात रस. गेल्या 9 वर्षांपासून पत्रकारिता क्षेत्रात काम करत असून यापूर्वी टीव्ही ९ मराठी, साममध्ये कामाचा अनुभव आहे. यशवंतराव चव्हाण मुक्त विद्यापीठातून बॅचलर ऑफ मास कम्युनिकेशन अँड जर्नालिझमचं शिक्षण घेतलं आहे.… आणखी वाचा