शासकीय सदनिका लाटल्याप्रकरणी माणिकराव कोकाटे यांना २ वर्षांची शिक्षा झाल्याने मंत्रिमंडळातून गच्छंती झाली आहे. त्यांच्या जागी कोणाची वर्णी लागणार याकडे लक्ष लागले असताना, माजी मंत्री धनंजय मुंडे पुन्हा मंत्रिपदासाठी प्रयत्न करत आहेत.
कोकाटे अडचणीत आलेले असताना माजी मंत्री धनंजय मुंडे काल दिल्लीत गेले होते. त्यांनी केंद्रीय गृहमंत्री अमित शहांची भेट घेतली. मुंडे मंत्रिपदासाठी लॉबिंग करत असल्याची चर्चा सुरु झाली. विशेष म्हणजे मुंडे हे फडणवीस सरकारमधून राजीनामा द्यावा लागलेले पहिले मंत्री आहेत. राज्यात गेल्या वर्षीच्या अखेरीस निवडणूक झाली. महायुती सत्तेत कायम राहिली. मुख्यमंत्रिपदी देवेंद्र फडणवीस यांची वर्णी लागली. पण त्यानंतर काही दिवसांत मुंडे अडचणीत आले. बीडच्या मस्साजोग गावचे सरपंच संतोष देशमुख यांच्या निर्घृण हत्या प्रकरणात मुंडे यांचा निकटवर्तीय वाल्मिक कराडला अटक झाली. मुंडे यांच्यावरही गंभीर आरोप झाले. अखेर अर्थसंकल्पीय अधिवेशनादरम्यान त्यांनी राजीनामा दिला.
इजा बिजा तिजा; कोकाटेंच्या अडचणी संपेनात, काल खाती गेली, आज मंत्रिपद; आता नवं संकट आ वासून उभं
आता धनंजय मुंडे पुन्हा एकदा मंत्रिपदासाठी उत्सुक आहेत. काल ते अमित शहांच्या भेटीसाठी दिल्लीला गेले. याबद्दल दिल्लीतच असलेल्या राष्ट्रवादी काँग्रेसचे प्रदेशाध्यक्ष सुनील तटकरे यांना विचारणा करण्यात आली. ‘मुंडे इथे आहेत हे मला माहीत नाही. त्यांचे हायकमांड तर मुंबईत आहेत. मग ते इथे काय करतात ते आम्ही त्यांना विचारु’, अशी प्रतिक्रिया तटकरेंनी दिली. सोबतच विरोधकांचा मुंडे यांना पुन्हा मंत्रिपद देण्यास ठाम विरोध आहे. त्यामुळे मुंडे यांची मंत्रिमंडळात वर्णी लागण्याची शक्यता धूसर होते.
धनंजय मुंडे मराठवाड्यातून येतात. ते वंजारी समाजाचे आहेत. मुंडे यांच्या गच्छंतीमुळे सध्या अजित पवारांच्या राष्ट्रवादी काँग्रेसमधील एकही मंत्री मराठवाड्यातील नाही. कोकाटे मराठा समाजाचे आहेत. ते नाशिकमधून येतात. उत्तर महाराष्ट्रातून कोकाटे यांच्यासह छगन भुजबळ आणि नरहरी झिरवळ मंत्रिमंडळात संधी देण्यात आली. पैकी कोकाटेंनी राजीनामा दिला आहे. मराठा असलेल्या कोकाटे यांच्या जागी अन्य मराठा नेत्याला संधी देऊ शकते.माणिकराव कोकाटे गोत्यात, मुंडे दिल्लीत; थेट अमित शहांची भेट; धनुभाऊंचं टायमिंग चर्चेत
परभणीच्या पाथरी मतदारसंघाचे आमदार राजेश विटेकर मंत्रिपदाच्या शर्यतीत आहेत. विटेकर यांना संधी दिल्यास मराठा आणि मराठवाडा ही दोन्ही समीकरणं साधली जातात. त्यामुळे एकाच दगडात दोन पक्षी मारले जातात. विशेष म्हणजे खुद्द विटेकर यांनीदेखील पक्ष नेतृत्त्वाकडे तशी मागणी केलेली आहे. मंत्रिपदासाठी आपला विचार व्हावा, अशी विनंती विटेकर यांनी आधीच केलेली आहे.
लेखकाबद्दलकुणाल गवाणकर“कुणाल किशोर गवाणकर, महाराष्ट्र टाईम्समध्ये प्रिन्सिपल डिजिटल कंटेंट प्रोड्युसर पदावर कार्यरत आहेत. राज्य आणि राष्ट्रीय पातळीवरील राजकीय घडामोडींच्या बातम्या आणि त्यांचे विविध पैलू उलगडणारं लिखाण करण्यात हातखंडा. ब्रेकिंग न्यूज सोबतच राजकीय घडामोडींमधील बारकावे टिपून इनसाईड माहितीच्या आधारे सखोल विश्लेषण करणारं लिखाण करण्यात निष्णात. राष्ट्रीय आणि आंतरराष्ट्रीय पातळीवरील रंजक घटना आणि घडामोडींवर लिखाण.
तीन वर्षांपासून महाराष्ट्र टाइम्समध्ये कार्यरत. त्याआधी लोकमत ऑनलाइन, लोकसत्ता ऑनलाइनमध्ये काम. न्यूज 18 लोकमत, टीव्ही 9 वृत्तवाहिन्यांमध्ये कामाचा अनुभव. पत्रकारितेत 14 वर्षांपासून कार्यरत.”… आणखी वाचा