विधानपरिषदेत लक्षवेधी सूचनेच्या माध्यमातून भारतीय यांनी हा मुद्दा उपस्थित केला. ध्वनी प्रदूषणामुळे ज्येष्ठ नागरिक, रुग्ण, विद्यार्थी आणि लहान मुलांचे आरोग्य धोक्यात येत असल्याचे त्यांनी नमूद केले. सोलापूरमध्ये प्रशासन, पोलिस आणि नागरिकांच्या सहकार्याने डीजेवर नियंत्रण आणण्यात यश आल्याचे उदाहरण त्यांनी दिले. आज सोलापुरात सर्व धार्मिक कार्यक्रमांमधून डीजे बाद झाला आहे. तेथे आपली पारंपारिक वाद्य वाजत आहेत. त्यामुळे राज्यभर अशाच प्रकारची अंमलबजावणी करावी, अशी अपेक्षा त्यांनी व्यक्त केली.

यावर उत्तर देताना पर्यावरण मंत्री पंकजा मुंडे यांनी ध्वनी प्रदूषणाचा त्रास होतो, हे वास्तव असल्याचे मान्य केले. सोलापूर पॅटर्न निश्चितच कौतुकास्पद असल्याचे सांगत, ध्वनी मर्यादा ओलांडून तसेच रात्री दहा नंतर डीजे वाजवण्यास कोणतीही परवानगी नसल्याचे त्यांनी स्पष्ट केले. असे प्रकार घडतात ते अवैधरीत्या होत असल्याचे सांगून, तक्रार प्राप्त झाल्यास त्यावर कारवाई केली जाते, असेही मुंडे म्हणाल्या. तसेच, ध्वनी प्रदूषणाबाबत कारवाई करण्याचे अधिकार मुख्यतः पोलिसांकडे असल्याने पर्यावरण मंत्रालयाची भूमिका मर्यादित असल्याचे त्यांनी स्पष्ट केले.

दरम्यान, राष्ट्रवादी काँग्रेस (अप) चे आमदार अमोल मिटकरी यांनी राज्यात डीजेवर कायमस्वरूपी बंदी आणावी आणि सोलापूर पॅटर्न संपूर्ण महाराष्ट्रात राबवावा, अशी ठाम मागणी केली. यावर उत्तर देताना मंत्री मुंडे यांनी, मंत्रालयाकडून सक्ती करता येत नसल्याचे सांगितले. हा निर्णय समाजाने स्वतःहून घ्यायला हवा, नागरिकांनी आणि लोकप्रतिनिधींनीही जनजागृती करावी, असं आवाहन त्यांनी केलं.