Pune FDA Action: उत्तर प्रदेश आणि बिहार या राज्यांमधून या औषधांचा पुरवठा झाला आहे. त्यामुळे परराज्यातून येणाऱ्या बनावट औषधांचा मुद्दा पुन्हा एकदा समोर आला आहे.
शहरात ‘कायमोराल फोर्ट’ (सूज कमी करणारी गोळी) या औषधाची बनावट विक्री होत असल्याची माहिती ‘एफडीए’च्या अधिकाऱ्यांनी मिळाली. त्यानुसार ‘एफडीए’च्या पथकाने सदाशिव पेठ येथील ‘अक्षय फार्मा’ येथून औषधांचे नमुने गोळा करून तपासणीसाठी पाठवले. ‘अक्षय फार्मा’ यांनी सदाशिव पेठेतील ‘आर्जस मेडिकल अँड डिस्ट्रिब्युटर्स’कडून या औषधांची खरेदी केली होती. आर्जस मेडिकलला हा पुरवठा एरंडवण्यातील ‘रिद्धी फार्मा’ यांच्याकडून झाला होता, असे तपासातून समोर आले.
Pune MHADA: पुण्यात स्वस्तात मस्त घर; म्हाडातर्फे 4186 घरांसाठी बंपर लॉटरी, सोडत कधी निघणार? जाणून घ्या
‘रिद्धी फार्मा’ची चौकशी केली असता, त्यांनी या औषधांची खरेदी लखनौ (उत्तर प्रदेश) येथील ‘मे. सेना फार्मा’ येथून केल्याचे समोर आले. यानंतर ‘एफडीए’च्या पथकाने लखनौ येथे जाऊन तपासणी केली. या तपासणीत ‘मे. सेना. फार्मा’ यांनी ही औषधे गोपालगंज (बिहार) येथील ‘महिवाल मेडिको’ येथून खरेदी केल्याचे स्पष्ट झाले. गोपालगंज येथून उमंग रस्तोगी नावाच्या व्यक्तीने दोन कोटी २३ लाख ७२७ रुपयांच्या औषधांची खरेदी केली होती. रस्तोगीने हे पैसे महेश गर्ग याला रोखीने हस्तांतरित केले होते. मात्र, गोपलगंज येथील कंपनीचा परवाना २० नोव्हेंबर २०२४ रोजी कालबाह्य झाला असल्याचे तपासात समोर आले. त्यामुळे सिक्कीम येथील कंपनीचे खोटे लेबल लावून औषधांची विक्री करण्यात येत होती.
काही महिन्यांपूर्वीच प्रकार उघड
पुण्यात अॅलोपॅथी आणि आयुर्वेद या दोन्ही पॅथींच्या बनावट औषधांचा पुरवठा झाल्याचे काही महिन्यांपूर्वीच उघडकीस आले होते. ‘अँटिबायोटिक’ (प्रतिजैविके) म्हणून वापरण्यात येणाऱ्या ‘अॅझिश्रोमायसिन’ सह उच्च रक्तदाब आणि मधुमेह नियंत्रणासाठी वापरण्यात येणाऱ्या गोळ्यांमध्ये भेसळ आढळून आली होती. या गोळ्यांमध्ये मूळ औषधांएवजी ‘पॅरासिटामॉल’ असल्याचे एफडीए तपासणीतून स्पष्ट झाले होते. याशिवाय बनावट ‘अल्ब्युरेल’ (१०० एमएल) इंजेक्शनचा साठा जप्त करण्यात आला होता.
Pune Crime : दोन कोटी खर्चून लग्न, फॉर्च्युनर आणि 55 तोळे सोने देऊनही छळ, पुण्यात विवाहितेचा सासऱ्याकडून विनयभंग
या प्रकरणी विश्रामबाग पोलिस ठाण्यात तक्रार केली आहे. नियमानुसार बनावट औषधांची विक्री किंवा खरेदी केल्यास ७ ते १० वर्षांचा तुरुंगवास आणि १० लाख रुपयांचा दंड होऊ शकतो. बनावट औषधांची विक्री टाळण्यासाठी पुणे विभागात नियमीतपणे कारवाई करण्यात येत आहे. – गिरीश हुकरे, सहआयुक्त, पुणे विभाग, एफडीए
औषधांची खरेदी नेहमी केवळ अधिकृत आणि परवानाधारक स्रोतांकडूनच करा. संशयास्पद पुरवठ्यामुळे रुग्णांच्या आरोग्याचा धोका निर्माण होतो आणि कायदेशीर अडचणीही उद्भवू शकतात. घाऊक व किरकोळ दोन्ही स्तरांवर कायदेशीर पुरवठा साखळीचे काटेकोर पालन झालेच पाहिजे.-अनिल बेलकर, सचिव, केमिस्ट असोसिएशन ऑफ पुणे डिस्ट्रिक्ट
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा