प्रभाग क्रमांक १२ चे माजी नगरसेवक प्रवीण भालेकर यांनी राष्ट्रवादी काँग्रेसला सोडचिठ्ठी देत भारतीय जनता पक्षात प्रवेश करण्याचा निर्णय घेतला आहे. भालेकर यांच्या निर्णयामागील मुख्य कारण म्हणून स्थानिक पातळीवरील नगरसेवकाच्या मक्तेदारीमुळे पक्षातील कामकाजावर प्रभाव पडत असल्याचे सांगितले जात आहे. गेल्या काही दिवसांपासून भालेकर हे अजित पवार यांना सोडचिठ्ठी देतील असं बोललं जात होतं. अखेर आज भालेकर यांनी आपला निर्णय जाहीर करत भाजपमध्ये प्रवेश करणार असल्याचं स्पष्ट केल आहे.

Nagpur News: महाराष्ट्रात भीक मागणं ठरणार बेकायदेशीर! दोन्ही सभागृहात विधेयक मंजूर, पण १३ डिसेंबरला…

स्थानिक पातळीवरील राजकारणात पक्षातीलच एका नगरसेवकाची वाढती मक्तेदारी आणि कार्यशैली यामुळे मी त्रस्त झालो होतो. नागरिकांच्या कामांना योग्य न्याय मिळत नव्हता. त्यामुळे विकासाला प्राधान्य देत आमदार महेश लांडगे यांच्यासोबत भाजपमध्ये जाण्याचा निर्णय घेतला असल्याचं प्रविण भालेकर म्हणाले आहेत. या प्रवेशामुळे प्रभागातील तसेच शहरातील राजकीय समीकरणांमध्ये बदल होण्याची शक्यता आहे.

यासंदर्भात लवकरच औपचारिक घोषणा आणि प्रवेश कार्यक्रम आयोजित करण्याची शक्यता आहे. हिवाळी अधिवेशन संपल्यानंतर पिंपरी-चिंचवड येथे हा प्रवेश सोहळा होणार आहे. राष्ट्रवादी काँग्रेसच्या एका वरिष्ठ नेत्याने भालेकर यांच्या भाजप प्रवेशानंतर प्रतिक्रिया देत हा आम्हाला निश्चितच धक्का आहे. निवडणुकीपूर्वीच पक्षातील अंतर्गत कलह सार्वजनिक होत असल्याचे दिसून येते असल्याचं म्हणत अजित पवारांच्या राष्ट्रवादीमध्ये पिंपरी चिंचवड मध्ये सर्वकाही आलबेल नसल्याचे संकेत दिले आहेत.

एकीकडे महायुतीमध्ये एकमेकांचे नेते फोडण्यावरून आधीच वाद सुरु आहे. त्यात आता भाजपने थेट अजित पवारांचा बालेकिल्ला असणाऱ्या पिंपरी – चिंचवड मध्येच मोठा धक्का दिल्याने हा वाद आणखीचं वाढण्याची शक्यता आहे.