मालाड येथे भांड्यांचे दुकान असलेल्या विक्रेत्याकडे मोहन उर्फ सिरोही काका नावाची व्यक्ती आली. त्याने तीन स्टीलचे ग्लास खरेदी केले. मारवाडी भाषेत बोलत असल्याने, भांडी विक्रेत्याने त्याला राजस्थानचा आहे का? असे विचारले. त्याने राजस्थानच्या सिरोही येथील असल्याचे सांगत ग्लास घेऊन निघून गेला. दोन दिवसांनी पुन्हा दुकानात येऊन त्याने दोन स्टीलच्या वाट्या खरेदी केल्या आणि यावेळी त्याने चांदीचे एक नाणे दाखवले. नाशिक येथे खोदकाम करताना हे नाणे सापडल्याचे तो म्हणाला. तिसऱ्यांदा मोहन पुन्हा आला. मात्र, यावेळी एक तरुण त्याच्यासोबत होता. आपला भाचा असल्याची ओळख त्याने करून दिली. यावेळी येताना सोबत एक सोन्याची बोरमाळ आणली होती. यातील दोन मणी काढून भांडी विक्रेत्याला दिले आणि तपासणी करून घ्यायला सांगितले. भांडीविक्रेत्याने दोन मण्यांची तपासणी केली असता, ते खरे असल्याचे स्पष्ट झाले.

मुलीच्या अ‍ॅडमिशनचा जुगाड पडला भारी; महिला कस्टम अधिकाऱ्याने 33 लाख गमावले, नेमकं काय घडलं?
भांडी विक्रेत्याचा विश्वास बसल्याचे पाहून मोहनने सुमारे एक किलो वजनाच्या अनेक बोरमाळा असून, स्वस्तात देण्याचे आमिष दाखवले. सध्या सोन्याचे दर वाढत असताना स्वस्तात सोने मिळत असल्याचे पाहून व्यापाऱ्याने खरेदी करण्याची तयारी दर्शवली. एक किलोच्या जवळपास वजन असलेल्या या बोरमाळा २५ लाखांना घेण्याची तयारी त्यांनी दर्शवली.

Devendra Fadnavis: महापालिका निवडणुकीत ‘ब्रँड ठाकरे’चा फुगा फुटेल; CM फडणवीसांचा विरोधकांना टोला
मोहनने भांडीविक्रेत्याला पैसे घेऊन नॅशनल पार्क जवळ बोलावले. या ठिकाणी भांडी विक्रेता पोहोचल्यानंतर पत्नी साईधाम मंदिर ठाकूर कॉम्प्लेक्स जवळ सोने घेऊन उभी असल्याचे सांगत मोहन त्याला रिक्षाने घेऊन गेला. या ठिकाणी २५ लाख देऊन भांडी विक्रेत्याने सोन्याच्या बोरमाळा घेतल्या. दुसऱ्या दिवशी या माळा त्याने सोनाराकडे दिल्या, त्यावेळी यात सोने नसून तांबे आणि निकेल धातू असल्याचे उघडकीस आले. फसवणूक झाल्याचे लक्षात येताच, भांडी विक्रेत्याने मोहनला संपर्क करण्याचा प्रयत्न केला. मात्र, त्याचा फोन बंद येत होता. खोटे सोने देऊन २५ लाखांची फसवणूक केल्याप्रकरणी मालाड पोलिस ठाण्यात गुन्हा दाखल करण्यात आला आहे.