“दुपारी 12 ते साडेबारा वाजताच्या सुमारास दिपाली पाटील या साई लॉजमध्ये गेल्या होत्या. त्यानंतर काही वेळाने त्यांच्या मागून संदीप गायकवाड हादेखील दिपाली पाटील असलेल्या रूममध्ये गेल्याचं सीसीटीव्ही फुटेजमध्ये आढळून आलं आहे, ” अशी माहिती जामखेडचे पोलीस निरीक्षक दशरथ चौधरी यांनी दिली आहे. त्यामुळे संदीप गायकवाड याने साई लॉजमधील रूममध्येही दिपाली पाटीलला काही त्रास दिला का, याबाबत आता अधिक तपास केला जात आहे.

नेमकं काय घडलं?

कल्याण येथील रहिवासी असलेल्या दिपाली पाटील या जामखेडमधील घुंगरू कला केंद्रात नृत्यांगना म्हणून काम करत होत्या. सुमारे दोन वर्षांपासून त्या रेश्मा आयुब पठाण यांच्यासोबत नृत्यकला सादर करत होत्या. दिपाली तिच्या मैत्रिणींसोबत तपनेश्वर गल्लीत राहत होती. तिच्या आईने दिलेल्या तक्रारीनुसार, संदीप सुरेश गायकवाड हा दिपालीला सतत लग्नासाठी मागणी करत होता आणि नकार दिल्याने तिला त्रास देत होता.

दिपालीने तिच्या आईला फोनवरून या त्रासाबद्दल सांगितले होते. 4 डिसेंबर 2025 रोजी दुपारी 12:50 वाजता दिपाली संदीप गायकवाडसोबत साई लॉजमध्ये गेली होती. सायंकाळी 5 वाजता दिपालीची मैत्रीण हर्षदा कामटे आणि तिची आई साई लॉजमध्ये पोहोचले असता, त्यांना दिपालीने रूम नंबर 103 मध्ये ओढणीने गळफास घेतलेल्या अवस्थेत आढळले. तिला तातडीने ग्रामीण रुग्णालय जामखेड येथे नेण्यात आले, जिथे डॉक्टरांनी तिला मृत घोषित केलं.

दरम्यान, या प्रकरणी जामखेड पोलीस स्टेशनमध्ये आत्महत्येस प्रवृत्त केल्याप्रकरणी कलम 108 भादवी (BNS108 प्रमाणे 648 / 2025) नुसार गुन्हा दाखल करण्यात आला आहे. पोलीस निरीक्षक दशरथ चौधरी यांच्या मार्गदर्शनाखाली पोलीस उपनिरीक्षक किशोर गावडे तपास करत आहेत. आरोपी संदीप गायकवाड याला पोलिसांनी अटक केली आहे. दिपालीचे आई-वडील आणि नातेवाईक कल्याण येथील रहिवासी आहेत. शवविच्छेदन अहवालानंतर दिपालीच्या मृतदेहावर पुढील विधींसाठी पार्थिव नातेवाईकांच्या ताब्यात देण्यात आले असून, अंत्यसंस्कार कल्याण येथे होणार आहेत. या घटनेमुळे परिसरात मोठी खळबळ उडाली आहे.