येणाऱ्या महानगर पालिकेतील काही इच्छुक उमेदवारांची नावेच मतदार यादीतून गायब झाले आहेत. त्याची त्यांनी चौकशी केली असता जिवंतपणी त्यांना मृत झाल्याचा दाखला देत या कारणास्तव आपले नाव मतदार यादीत नाल्याचे सांगण्यात आले आहे. या अजब कारभारामुळे जिवंत असलेले, पण कागदोपत्री मयत दाखवलेले इच्छुक उमेदवार आता उच्च न्यायालयाचा दरवाजा खटकावणार आहेत.

नेमकं प्रकरण काय?

नाशिकच्या सिडको परिसरातील विविध प्रभागातून भारतीय जनता पक्षाकडून इच्छुक असलेल्या अविनाश पाटील आणि उत्तम अर्जुन काळे उमेदवारांना चक्क कागदोपत्री मृत घोषित करण्यात आले आहे. त्यामुळे या इच्छुकांची नावे ही नवीन मतदार यादीतून वजा करण्यात आली आहेत. ही बाब लक्षात येताच सदर इच्छुकांनी मनपा विभागात जाऊन चौकशी केली. त्यानंतर तेथून त्यांना जिल्हाधिकारी कार्यालय येथील जिल्हा निवडणूक अधिकारी यांच्या दालनात जाण्यास सांगण्यात आले. त्यांनी जिल्हा निवडणूक अधिकारी यांचे दालन गाठले आणि मतदार यादीतून नावे नसल्याबाबत विचारले.यावेळी त्याठिकाणी पडताळणी करून त्यांना जिवंतपणीचं मयत असल्याचा दाखला देण्यात आला आहे. हे ऐकून चक्रवलेल्या इच्छुकांनी आपण आपल्या समोर जिवंत असल्याचे सांगितले. पण समोर जिवंत उभ्या असलेल्या व्यक्तीला येथील अधिकारी यांनी “हायकोर्टातून मतदार यादीत आपले नाव समाविष्ट करण्याचे आदेश आणा. त्यानंतर आपले नाव या मतदारयादीत समाविष्ट केले जाईल”, असा सल्ला त्यांना देण्यात आला.

निवडणूक विभागाच्या निरीक्षकाने, निवडणूक अधिकाऱ्याने अशा गोष्टींची चौकशी करणे आवश्यक असताना त्याप्रमाणे कुठलीही चौकशी करण्यात आली नाही. आगामी निवडणुकीत प्रतिस्पर्धी असलेल्या किंवा विरोधकांनी बूथ लेवल ऑफिसर किंवा शासकीय अधिकारी यांना हाताशी धरून हे कट कारस्थान केले असल्याचा आरोप यावेळी करण्यात आला आहे.

केवळ मयत व्यक्तीशी आपल्या नावाचे साधर्म्य असून, कुठलीही पडताळणी किंवा चौकशी संबंधित निवडणूक विभागाच्या अधिकारी यांनी करायला हवी होती. पण तसं न झाल्यामुळे हा सर्व गौडबंगाल झाल्याचे देखील पीडित यांनी म्हटले आहे. त्यामुळे आता आपल्याला हाय कोर्टात न्याय मिळेल हीच अपेक्षा पीडितांना आहे.