पबमध्ये मित्रांसोबत प्यायला बसला

घटनेमध्ये मृत्यू झालेल्या तरुणाचं नाव सत्येंद्र मंडल (वय 30, मूळ बिहार) असं आहे. तो संबंधित पबमध्ये मागील काही महिन्यांपासून काम करत होता. कुटुंबाच्या आर्थिक परिस्थितीत मदत करण्यासाठी तो पुण्यात स्थायिक झाला होता, अशी माहिती त्याच्या सहकाऱ्यांनी दिली. अपघात करणारा चालक प्रतापसिंह कायंगडे (वय 49) हा मूळचा नवी मुंबईतील नेरूळ भागातील असून सध्या धानोरी येथे राहत आहे. तो येरवड्यातील एका प्रतिष्ठित आयटी कंपनीत संगणक अभियंता म्हणून कार्यरत आहे. पोलिसांनी दिलेल्या माहितीनुसार, रविवारी सुट्टीचा दिवस असल्याने तो दुपारी कल्याणीनगरमधील पबमध्ये मित्रांसमवेत गेला होता.
Sanjay Raut : ठाकरेसेनेची मुलुखमैदानी तोफ पुन्हा कडाडली, संजय राऊत आजारपणानंतर माध्यमांसमोर; विरोधकांना धारेवर धरलं

‘आपण स्वतः वाहन चालवू नये’

पोलिस तपासात समोर आलेल्या माहितीनुसार, कायंगडे याने पबमध्ये मोठ्या प्रमाणात दारू पिली होती. दुपारी साधारण तीन वाजताच्या सुमारास कायंगडे पबबाहेर पडला. विशेष म्हणजे, वाहन वॅलेट पार्किंगमध्ये दिले होते. मात्र, तेव्हा कायंगडेला उभं देखील राहता येत नव्हतं त्यामुळे त्याची अवस्था पाहून कर्मचारी चिंताग्रस्त झाले. कर्मचारी मंडळींनी वारंवार विनंती करत, ‘आपण स्वतः वाहन चालवू नये, ॲप आधारित टॅक्सीने घरी जा,’ असं स्पष्टपणे सांगितलं. परंतु कायंगडे यांनी कोणाचाही सल्ला न ऐकता कार स्वतःच चालवण्याचा हट्ट धरला.

धडक इतकी प्रचंड होती की…

साक्षीदारांच्या मते, कायंगडे याने कार सुरू करण्याचा प्रयत्न करताना संतुलन गमावले आणि वाहन अचानक पुढे वेगाने गेले. या गोंधळात सत्येंद्र मंडल यांना जोरदार धडक बसली. धडक इतकी प्रचंड होती की मंडल गंभीर जखमी होऊन खाली कोसळले. घटनास्थळी असलेले कर्मचारी आणि नागरिक त्यांना वाचवण्याचा प्रयत्न करत असतानाच त्यांचा मृत्यू झाल्याचं स्पष्ट झालं. घटनेची माहिती मिळताच येरवडा पोलीस ठाण्याचे पथक तात्काळ घटनास्थळी दाखल झाले. पोलिसांनी प्रतापसिंह कायंगडे याला त्वरित अटक केली. प्राथमिक चौकशीत त्याच्याकडून मद्यप्राशन केल्याची कबुली मिळाल्याचे सांगण्यात येतं. पुढील तपासासाठी त्याची वैद्यकीय चाचणी करण्यात आली आहे.

Rupali Patil : श्रीकांत शिंदेंची भेट, आता अजित पवारांची साथ सोडणार? रुपाली पाटील म्हणाल्या, माझ्यासोबत…

निष्काळजीपणामुळे निरपराध तरुणाचा जीव गेला

या संपूर्ण घटनेबद्दल बोलताना वरिष्ठ पोलीस निरीक्षक अंजुम बागवान म्हणाले, ‘कर्मचाऱ्यांनी सावधगिरीचा सल्ला देऊनही चालकाने मद्यधुंद अवस्थेत वाहन चालवण्याचा निर्णय घेतला. त्याच्या निष्काळजीपणामुळे निरपराध तरुणाचा जीव गेला. या प्रकरणी कठोर कारवाई केली जाईल.’ सत्येंद्र मंडल यांचा मृत्यू ही परिसरातील आणखी एक दुर्दैवी घटना ठरली असून पब कर्मचारी आणि स्थानिक रहिवासी मोठ्या धक्क्यात आहेत. घटनेमुळे पुन्हा एकदा मद्यधुंद वाहनचालनाच्या वाढत्या धोक्याचा मुद्दा समोर आला आहे.