सक्षम ताटे हा नांदेड शहरातील इतवारा भागातील संघसेननगर येथील रहिवासी आहे. त्याच्या मित्राची बहीण आंचल मामीडवार सोबत प्रेमसंबंध सुरु होते. तीन वर्षांपूर्वी त्यांची इंस्टाग्राम ओळख झाली होती, त्यानंतर ओळखीचं रूपांतर प्रेमात झालं. मयत हा नेहमी मित्राच्या घरी यायचा. दरम्यान, त्यांच्या प्रेमाला मुलीच्या कुटुंबाचा विरोध होता. आंचलच्या कुटुंबियांनी सक्षमला समज दिली होती. तरी सुद्धा प्रेम प्रकरण सुरूच होते. 27 नोव्हेंबर रोजी सायंकाळी पाच वाजेच्या सुमारास जुनागंज भागात सक्षमची गोळ्या झाडून आणि डोक्यात फरशी घालून निर्घृणपणे खून करण्यात आला.

मुलीचे वडील गजानन मामीडवार, भाऊ साहिल मामीडवार आणि विधीसंघर्ष असलेल्या अन्य एका भावाने इतर सहकार्यासोबत मिळून हत्या केली. आरोपी आणि मयत गुन्हेगारी पार्श्वभूमीचे होते. त्यांच्यावर गंभीर स्वरूपाचे गुन्हे देखील दाखल होते. पोलिसांकडून एमपीडीए अंतर्गत कारवाई करण्यात आली होती. दरम्यान, पोलिसांनी या प्रकरणात आई-वडील दोन भावासह एकूण आठ जणांविरोधात खुनाचा आणि अट्रॉसिटीचा गुन्हा दाखल केला आहे.
Nanded Crime : अधुरी एक कहाणी! माझ्या आई-बापाला फाशीची शिक्षा द्या… प्रेयसीनं प्रियकराच्या बॉडीसमोर त्याच्या नावाचं कपाळावर लावलं कुंकू, महाराष्ट्र हादरला
सक्षम ताटे विरोधात गुन्हा दाखल करण्यासाठी कुटुंबियांकडून दबाव सुरु होता, असा आरोप आंचल मामीडवारने केला आहे. घटनेच्या काही तासांपूर्वी विधीसंघर्ष असलेल्या भावाने आंचलला इतवारा पोलीस ठाण्यात गुन्हा दाखल करण्यासाठी नेले होते. पण, तिने तक्रार दाखल करणार नसल्याचे सांगितले, याच विषयावरून तिचा भावासोबत वाद झाला. तिने आपला मोबाईल फोडला आणि घरी परतली अशी माहिती आहे. त्यानंतर काही तासानंतर हत्याकांड घडलं.

वर्षभरापूर्वी कुटुंबियांच्या दबावाखाली सक्षम ताटे विरोधात पोक्सोचा गुन्हा दाखल केल्याचे आंचलने सांगतिलं. जेव्हा ती संज्ञान झाली तेव्हा तिने न्यायालयात जाऊन कुटुंबियांच्या दबावाखाली आपण गुन्हा दाखल केल्याचा जवाब दिला होता. दरम्यान, आज आरोपीची तीन दिवसाची पोलीस कोठडी संपल्याने पोलिसांनी त्यांना न्यायालयात हजर करण्यात आले. न्यायालयाने चार आरोपीच्या पोलीस कोठडीत तीन दिवसांची वाढ केली. तर, मुलीची आई जयश्री मामीडवार हिला न्यायालयीन कोठडी सुनावली. या प्रकरणात पोलिसांनी आरोपींना भडकवल्याचा आरोप आंचलने केला आहे. या संदर्भात आंचल आणि मयताच्या कुटुंबियांनी आयजी शहाजी उमाप यांची भेट घेतली.