मिळालेल्या माहितीनुसार, अमरावतीतील शंकरनगर परिसरातील वैभव कॉलनीत नीलिमा खरबडे एकट्याच राहत होत्या. रविवारी सायंकाळी सुमारे 7 वाजताच्या सुमारास त्यांच्या बहिणीचा मुलगा त्यांना भेटायला आला असता, त्याने घरात नीलिमा यांचा रक्ताच्या थारोळ्यात मृतदेह पाहिला. त्यानंतर याबाबतची माहिती तात्काळ राजापेठ पोलिसांना माहिती दिली. पोलीस निरीक्षक पुनीत कुलट, गुन्हे शाखेचे अधिकारी आणि पथकाने तातडीने घटनास्थळी धाव घेतली. पोलीस उपायुक्त गणेश शिंदे व सहाय्यक पोलीस आयुक्त शाम घुगे यांनीही घटनास्थळाची पाहणी केली आणि त्यानंतर फॉरेन्सिक तज्ञ आणि ठसे तज्ञांच्या मदतीने घटनास्थळाचा सखोल पंचनामा करण्यात आला.

मृतदेहाच्या प्राथमिक तपासणीत नीलिमा यांच्या शरीरावर धारदार शस्त्राने अनेक वार केल्याचे दिसून आले आहेत. घरात मोठी चोरी झाल्याच्या खुणा नव्हत्या, परंतु सीसीटीव्ही सिस्टमची हार्ड डिस्क गायब असल्याचं पोलिसांच्या निदर्शनास आलं आहे. आरोपीने पुरावे नष्ट करण्यासाठीच हार्ड डिस्क गायब केल्याची शक्यता वर्तवण्यात येत आहे.

नीलिमा खरबडे यांची हत्या कोणी आणि का केली, हे अजून अस्पष्ट आहे. परंतु, घरातून हार्ड डिस्क गायब होणे, घरात जबरदस्तीच्या खुणा न दिसणे आणि वार करण्याच्या पद्धतीवरून ही हत्या अत्यंत नियोजनबद्ध असावी, असा प्राथमिक अंदाज वर्तवण्यात येत आहे. मारेकरी नीलिमा यांच्या परिचयाचे असण्याची शक्यताही तपासात विचारात घेतली जात आहे.

दरम्यान, गुन्हे शाखा आणि राजापेठ पोलीस संयुक्तपणे या प्रकरणाचा तपास करत आहेत. परिसरातील इतर सीसीटीव्ही फुटेज, फोन लोकेशन्स आणि तांत्रिक पुरावे तपासले जात असून आरोपी पोलिसांच्या हाती लागल्यानंतरच या हत्येचे नेमकं कारण स्पष्ट होणार आहे. शहरात वाढत्या हत्यांच्या मालिकेने नागरिकांमध्ये भीतीचं वातावरण निर्माण झालं आहे.