नाशिक तालुका पोलिसांत या प्रकरणी अज्ञाताविरुद्ध खुनाचा गुन्हा नोंदविण्यात आला आहे. खुनाचे कारण अद्याप अस्पष्ट असून, स्थानिक गुन्हे शाखांसह इतर पथकांना संशयितांच्या मागावर पाचारण करण्यात आले आहे. पोलिसांच्या माहितीनुसार, अरविंद पशुपतिनाथ पांडे ऊर्फ पप्पू पांडे (वय ३८, रा. लोंढे चाळ, सातपूर, मूळ रा. बिहार) असे खून झालेल्या तरुणाचे नाव आहे. याबाबत मृताचा भाचा रजनीश हरेंद्र तिवारी याने नाशिक तालुका पोलिसांत फिर्याद दिली आहे.

पती–पत्नीमध्ये पैशांवरून वाद गेला टोकाला; चक्क पत्राद्वारे पत्नीला तिहेरी तलाक देण्याचा प्रयत्न, नाशिकमध्ये खळबळ

चेहरा ठेचलेल्या अवस्थेत मृतदेह

गोवर्धन गावातील एका विजेच्या खांबाजवळ चेहरा ठेचलेल्या आणि अंगावर प्रचंड जखमा असलेल्या अवस्थेत पांडे याचा मृतदेह आढळला. घटनेची माहिती मिळताच उपविभागीय पोलिस अधिकारी वासुदेव देसले, तालुका पोलिस ठाण्याच्या निरीक्षक मृदुला नाईक व फॉरेन्सिक पथकाने आवश्यक कार्यवाही करून पुढील तपासाला सुरुवात केली. मृत्यूमागचे नेमके कारण काय आणि या हत्येला कोण जबाबदार आहे याचा शोध पोलीस लावत असून, तपास सुरू आहे.

वृद्धेचा खड्ड्यात पडून मृत्यू

दरम्यान, लाखलगाव येथील खडी क्रशरच्या खड्ड्यात साचलेल्या पाण्यात पडून वृद्धेचा मृत्यू झाला. राजूबाई सिंधू केंगे (वय ७०, रा. ओढा) असे मृत वृद्धेचे नाव आहे. शनिवारी (दि. २९) सायंकाळी सहाच्या सुमारास त्या घरात कोणाला काहीही न सांगता निघून गेल्या होत्या.

रात्री उशिराने लाखलगाव येथील खडी क्रशरने झालेल्या खड्ड्यात साचलेल्या पाण्यात त्या बेशुद्धावस्थेत आढळून आल्या होत्या. त्यांना जिल्हा रुग्णालयात दाखल केले असता वैद्यकीय अधिकाऱ्यांनी तपासून मृत घोषित केले. त्यांची मानसिक स्थिती बिघडलेली असल्याची माहिती समोर येत आहे. या प्रकरणी आडगाव पोलिसांत अकस्मात मृत्यूची नोंद करण्यात आली आहे.