Bhandara News : ही कारवाई एफआयआर दाखल न करताना राजकीय दबावाखाली करण्यात आल्याचा आरोप केला जात आहे
अश्लील पोस्ट चर्चेत
सोशल मीडियावर शनिवारी एक अश्लील पोस्ट चर्चेत आली. या पोस्टवरून मध्यरात्री दीड वाजता भंडारा येथील प्रभाग क्रमांक सातच्या महिला उमेदवारांचे पती विनोद भुरे यांच्या घरी सहाय्यक पोलिस निरीक्षक खांदाडे आणि काही पोलिस कर्मचारी पोहोचले. संबंधित पोस्ट तुम्ही केल्याचे सांगत त्यांना पोलिस ठाण्यात घेऊन जाण्यास निघाले. कारवाईदरम्यान, पोलिसांनी भुरे यांना घरातून बाहेर काढले आणि त्यांचा मोबाइल फोन जप्त केला. ही कारवाई एफआयआर दाखल न करताना राजकीय दबावाखाली करण्यात आल्याचा आरोप भुरे यांच्यासह भाजपचे जिल्हाध्यक्ष आशू गोंडाणे, भाजप नेते जॅकी रावलानी यांनी पत्रकार परिषदेत केला.
पोलिस अधीक्षकांकडे तक्रार
निवडणूक काळात राजकीय पुढाऱ्यांच्या दबावात येऊन कारवाई करणारे पोलिस निरीक्षक उल्हास भुसारी यांना तत्काळ निलंबित करण्यात यावे, यासाठी पोलिस अधीक्षकांकडे तक्रार करण्यात आली. तक्रारीवर योग्य ती कारवाई करण्याचे आश्वासन पोलिस अधीक्षकांनी दिल्याचे भाजप पदाधिकाऱ्यांनी सांगितले. सोबतच या प्रकरणाची तक्रार गृहमंत्री देवेंद्र फडणवीस आणि पालकमंत्री पंकज भोयर यांच्याकडे करणार असल्याचे त्यांनी नमूद केले.
शिल्पाराणी वाडकर भाजपमध्ये
दुसरीकडे, छत्रपती संभाजीनगर येथील शिवसेनेच्या माजी नगरसेवक शिल्पाराणी वाडकर यांनी रविवारी भारतीय जनता पक्षात (भाजप) प्रवेश केला. काही दिवसांपूर्वी त्यांनी शिवसेनेचा राजीनामा दिला होता. या वेळी शहराध्यक्ष किशोर शितोळे, समीर राजूरकर, संजय जोशी, ताराचंद गायकवाड, छाया खाजेकर, उज्ज्वला दहिफळे, हर्षवर्धन कराड, सचिन मिसाळ, हाफिज शेख, वंदना शाह आदींची उपस्थिती होती.
लेखकाबद्दलअनिश बेंद्रेअनिश सतीश बेंद्रे, महाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत आहेत. गेल्या तीन वर्षांपासून ते मटासोबत काम करत आहेत. राजकीय, गुन्हेगारी आणि मनोरंजन या विषयातील बातम्यांमध्ये त्यांचा विशेष हातखंडा आहे. ब्रेकिंग न्यूजसोबतच निवडणूक विषयक विश्लेषण करण्यात त्यांना अधिक रस आहे. त्यांनी झेविअर्स कॉलेजमधून मास कम्युनिकेशनचे पदव्युत्तर शिक्षण घेतले आहे. आतापर्यंत एबीपी माझा, टीव्ही9 मराठीसह पत्रकारिता क्षेत्रात 12 वर्षांहून अधिक काळचा अनुभव त्यांना आहे… आणखी वाचा