मिळालेल्या माहितीनुसार, मृतकाचे नाव पवन मेश्राम असे असून तो संताजी नगर परिसरात राहात होता. रविवारी सायंकाळी सुमारे पाचच्या दरम्यान पवन मेश्राम मोटरसायकलने आपल्या घरी जात असताना वेगात येणाऱ्या अज्ञात कार चालकाने त्याच्या दुचाकीला जोरदार धडक दिली. ही धडक इतकी भीषण होती की पवन रस्त्यावर खाली पडला आणि त्याक्षणी मागून येणाऱ्या कोळसा भरलेल्या ट्रकच्या मागील चाकाखाली तो जाऊन गंभीररीत्या जखमी झाला. अपघातानंतर काही क्षणातच त्याचा मृत्यू झाला.

Nagpur News: अत्यंत दुर्दैवी! चितेजवळ उभे होते, डिझेलचा भडका उडाला अन्… नको तेच घडलं, नागपूर हळहळलं, मन सुन्न करणारी घटना

महामार्गावरील वाहतूक विस्कळीत

घटनास्थळावर उपस्थित नागरिकांनी तत्काळ कन्हान पोलिसांना ही माहिती दिली. कन्हान पोलिस वाहतूक विभागाचे प्रभारी अनिल यादव आणि त्यांच्या सहकाऱ्यांनी घटनास्थळी धाव घेतली. गर्दी मोठी झाल्याने राष्ट्रीय महामार्ग क्रमांक 44 वरील काही तास वाहतूक विस्कळीत झाली होती. पोलिसांनी पंचनामा करून मृतदेह कामठी उपजिल्हा रुग्णालयात पाठवला असून पुढील तपास सुरू आहे.

या अपघातामुळे परिसरात हळहळ व्यक्त होत आहे. पवन मेश्राम हा कुटुंबातील कर्ता पुरुष असल्याचे सांगितले जात असून त्याच्या अकाली मृत्यूमुळे कुटुंबावर दु:खाचा डोंगर कोसळला आहे. ग्रामीण भागात महामार्गावरील वाहनधारकांचा वेग आणि निष्काळजीपणा वाढल्याने अपघातांची संख्या दिवसेंदिवस वाढत असल्याचे स्थानिकांनी चिंता व्यक्त केली आहे.

विशेषतः कांद्री धन्यवाद गेट परिसरात वाहतुकीची कोंडी, ट्रकची अव्यवस्थित हालचाल आणि रस्त्यावरील सुरक्षेअभावी अशा घटना वारंवार घडत असल्याचे नागरिकांचे मत आहे. कन्हान पोलिसांनी अज्ञात कार चालकाविरुद्ध गुन्हा दाखल केला असून जवळच्या सीसीटीव्ही फुटेजच्या आधारे वाहन आणि चालकाची ओळख पटवण्याचे प्रयत्न सुरू आहेत.