मिळालेल्या माहितीनुसार, गोपालकृष्ण लॉनच्या मागे वाठोडा परिसरात राहणाऱ्या ८३ वर्षीय सुशीलाबाई हरिभाऊ मुनघाटे यांचे निधन झाल्यानंतर गुरुवारी सकाळी त्यांच्या पार्थिवाचे अंत्यसंस्कार वाठोडा दहनघाटात करण्यात येत होते. त्यांच्या कुटुंबीयांसह अनेक नातेवाईक अंतिम विधीसाठी उपस्थित होते. चितेची परिक्रमा करत असताना ६४ वर्षीय विनोद पुंडलीकराव मुनघाटे (रा. कर्वेनगर, वर्धा मार्ग) हे चितेजवळ उभे होते.

मुंबईकरांना दिलासा देणारी बातमी: BMC राबवणार 100 कोटींचा प्रकल्प, काय आहे हा प्रोजेक्ट आणि याचा तुम्हाला कसा होणार फायदा?

याचदरम्यान उपस्थितांपैकी कोणीतरी चितेला अधिक पेट घेण्यासाठी डिझेल ओतले. डिझेलच्या संपर्कात येताच ज्वाळा अचानक मोठ्या प्रमाणात भडकल्या. त्यात विनोद मुनघाटे गंभीररीत्या भाजले, तसेच त्यांच्यासोबत चितेजवळ असलेले चार नातेवाईकही आगीत भाजले गेले. घटनास्थळी क्षणभरात गोंधळ उडाला. उपस्थितांनी तत्काळ सर्व जखमींना रुग्णालयात हलवले.

प्रथम सर्वांना शासकीय वैद्यकीय महाविद्यालय रुग्णालयात नेण्यात आले. मात्र विनोद यांच्या प्रकृतीची गंभीरता लक्षात घेता त्यांना पुढील उपचारासाठी ऑरेंज सिटी हॉस्पिटलमध्ये हलवण्यात आले. मात्र उपचारादरम्यान बुधवारी सायंकाळी त्यांचा मृत्यू झाला. उर्वरित चार जखमींवर उपचार सुरू असून त्यांची स्थितीही चिंताजनक असल्याचे रुग्णालयातल्या सूत्रांनी सांगितले.

माहिती मिळताच वाठोडा पोलीस ठाण्याचे पथक घटनास्थळी पोहचले. प्राथमिक माहितीच्या आधारे ही घटना अपघाती असल्याचे बोलले जात असले तरी पोलिसांनी अकस्मात मृत्यूची नोंद करून तपास सुरू केला आहे. डिझेल कोण आणि कशासाठी ओतले गेले, याचीही चौकशी करण्यात येत आहे. चितेवर डिझेल ओतण्याच्या निष्काळजीपणामुळेच हा गंभीर अपघात घडल्याची शक्यता व्यक्त होत आहे. या दुर्दैवी घटनेमुळे मुनघाटे कुटुंबावर शोककळा पसरली असून अंतिम संस्काराच्या स्थळी उपस्थित सर्व नातेवाईक हादरून गेले आहेत.