राजन पाटील म्हणाले की, “अनगरमध्ये आजपर्यंत कधीही निवडणूक झालेली नाही. मात्र यंदा पहिल्यांदाच निवडणूक होणार असल्याने तरुण मुलं उत्साहात होती. हा उत्साह तरुणांनी साजरा करण्याचा प्रयत्न केला. यावेळी आमच्या मुलानं तिथं जे वक्तव्य केलं मी त्याचं समर्थन करू शकत नाही. माझा मुलगा राजकारणाच्या दृष्टीने लहान आहे. त्यांच्या तोंडून नकळत अशा प्रकारचं वक्तव्य गेलं असल्याने त्याचा वडील म्हणून मी पाटील परिवाराच्या वतीने मी दिलगिरी व्यक्त करतो, क्षमा मागतो.”

“मोठ्या साहेबांच्या चरणी नतमस्तक होतो”

बाळराजे पाटील यांनी अनगर नगरपंचायत निवडणुकीवरून अजित पवारांशी पंगा घेतल्यानंतर स्पष्टीकरण देताना आज राजन पाटील म्हणाले की, “मोठे पवारसाहेब आणि अजितदादांपासून मी आज जरी बाजूला गेलो असलो तरी या गोष्टीला अजितदादा कारणीभूत आहेत, असं मी समजणार नाही. मी बाजूला जाण्याला अनेक कारणं आहेत. तरीसुद्धा मी कायमच त्यांचं नेतृत्व मान्य केलं आहे. आतापर्यंत जे वैभव उभा करण्यात आलं आहे, त्यामध्ये मोठ्या साहेबांचा आणि अजितदादांचा सिंहाचा वाटा आहे. माझ्या मुलाच्या तोंडातून उत्साहात आणि भावनेच्या भरात जे अपशब्द गेले आहेत, ते यत्किंचितही जायला नको होते. त्याबद्दल मी व्यक्तीश: अजितदादांचे आणि पवार परिवाराची मी अंतरकरणपूर्वक दिलगिरी व्यक्त करतो, क्षमा मागतो आणि मोठ्या साहेबांच्या चरणी नतमस्तक होतो,” अशा भावना पाटील यांनी व्यक्त केल्या आहेत.

दरम्यान, “राष्ट्रवादीच्या नेत्यांना राग येणं स्वाभाविक आहे. पण आपला मुलगा चुकला तर आपण त्याला पदरात घेतो, त्याप्रमाणे अजितदादांनी पार्थ आणि जयप्रमाणे माझ्या मुलाची ही चूक पदरात घ्यावी. माझी विनंती राहील की हा विषय आता इथे थांबवावा,” असं आवाहन राजन पाटील यांनी केलं आहे.