उल्हासनगराचे शिवसेनेनं भाजपच्या काही माजी नगरसेवकांना आपल्याकडे खेचून घेतलं होतं. त्याची आठवण मुख्यमंत्री फडणवीस यांनी शिंदेंच्या मंत्र्यांना करुन दिली. तुम्ही केलं तर चालवून घ्यायचं आणि आम्ही केलं तर आक्षेप नोंदवायचा, असं होणार नाही, अशा स्पष्ट शब्दांत फडणवीसांनी सेनेच्या मंत्र्यांना सुनावलं. पुढील वेळी पक्षप्रवेश करुन घेताना काळजी घ्या. तुम्ही पथ्यं पाळा. मग भाजपकडूनही पथ्यं पाळली जातील. योग्य काळजी घेतली जाईल, अशा शब्दांत फडणवीसांनी शिंदेसेनेच्या मंत्र्यांना समज दिली.
कॅबिनेट बैठकीवर शिंदेसेनेचा बहिष्कार; शिंदेसेनेत प्रचंड नाराजी, सेनेचे सगळे मंत्री CMच्या भेटीला
आज कॅबिनेट बैठकीपूर्वी शिंदेसेनेच्या मंत्र्यांची बैठक झाली. भाजपनं अवलंबलेल्या रणनितीचा, घाऊक पक्षप्रवेशांचा निषेध म्हणून, नाराजी दाखवून देण्यासाठी कॅबिनेटवर बहिष्कार टाकण्याचा निर्णय घेण्यात आला. मुख्यमंत्र्यांच्या नेतृत्त्वात होत असलेल्या कॅबिनेटला शिंदेसेनेचे मंत्री गेलेच नाहीत. पण शिंदे एकटे उपस्थित होते. मी उपमुख्यमंत्री असल्यानं मला बैठकीला जावं लागेल, असं सांगून शिंदे बैठकीला गेले.

शिंदेसेनेची सर्वाधिक नाराजी भाजपचे प्रदेशाध्यक्ष रविंद्र चव्हाण यांच्यावर आहे. चव्हाण डोंबिवलीतून निवडून येतात. ठाणे जिल्ह्यातील नेत्याकडे प्रदेशाध्यक्ष देत भाजपनं उपमुख्यमंत्री एकनाथ शिंदेंना सूचक इशारा दिल्याचं मानलं जातं. चव्हाण यांनी गेल्या काही दिवसांपासून पक्षप्रवेशाचा अक्षरश: धडाका लावला आहे. शिवसेनेच्या माजी नगरसेवकांच्या हातीदेखील त्यांनी कमळ दिलं आहे. त्यामुळे शिंदेसेनेत अस्वस्थता आहे. रविंद्र चव्हाण मुख्यमंत्री फडणवीसांचे निकटवर्तीय मानले जातात.
सुरुवात तुम्ही केली! शिंदेसेनेच्या मंत्र्यांना CM फडणवीसांनी झापलं; ‘त्या’ बैठकीत काय घडलं?
रविंद्र चव्हाण यांच्या रुपात भाजपच्या राज्यातील नेतृत्त्वानं शिवसेनेवर अचूक बाण चालवला आहे. चव्हाण यांच्या आक्रमक राजकारणामुळे संपूर्ण शिवसेना घायाळ झाली आहे. शिंदेसेनेचे मंत्री, आमदार असलेल्या मतदारसंघांमध्ये चव्हाण विरोधी पक्षातील नेत्यांचे पक्षप्रवेश घडवून आणत आहेत. आज एकीकडे सेनेचे मंत्री फडणवीस यांच्याकडे जाऊन भाजपमधील वाढत्या पक्षप्रवेशांबद्दल नाराजी व्यक्त करत असताना त्याच वेळी चव्हाण मात्र राजू शिंदे यांचं भाजपमध्ये स्वागत करत होते. राजू शिंदे गेल्या वर्षी झालेल्या विधानसभा निवडणुकीत शिंदेसेनेचे नेते संजय शिरसाट यांच्या विरोधात लढले आहेत. २०२९ मध्ये भाजप स्वबळावर लढणार आहे. त्याची तयारी चव्हाण यांनी आतापासूनच सुरु केली आहे. शिंदेसेनेचे आमदार असलेल्या मतदारसंघांमध्ये चव्हाण यांनी पुढील निवडणुकीसाठी उमेदवार तयार करण्यास सुरुवात केली आहे.