अपघातानंतर एका बाजूला लोक मदतीची अपेक्षा करत होते, तर दुसरीकडे काही जणांनी लुटालूट सुरू केली. दोन ट्रकच्या भीषण अपघातानंतर पैसे आणि सोन्याचे दागिने लुटण्यासाठी नागरिकांची एकच गर्दी झाली होती. पुण्यातील अपघातानंतर वाहनाला आग लागल्याने एका लहान चिमुरडीचा दुर्दैवी अंत झाला होता, तर कुटुंबातील व्यक्तींचा मृत्यू झाला होता. समाजात हळहळ व्यक्त केली जात असताना काही असंवेदनशील व्यक्तींनी मात्र सोने आणि पैसे गोळा करण्यासाठी एकच गर्दी केली होती. यानिमित्ताने सर्वसामान्य नागरिकांची संवेदनशीलता हरवत चालली आहे का, असा प्रश्न उपस्थित केला जात आहे. याबाबतचा व्हिडिओ आता सोशल मीडियावर व्हायरल होत आहे.

ट्रकमालकासह चालकावर गुन्हा दाखल

नवले पुलाजवळ झालेल्या अपघातात आठ जणांचा बळी गेला. या अपघातानंतर लागलेल्या आगीत ट्रकचालक आणि मदतनीस यांचा होरपळून मृत्यू झाला. हे दोघे राजस्थानचे रहिवासी होते. त्यांच्यासह ट्रक मालकावरही गुन्हा दाखल करण्यात आला आहे. अपघातात ट्रकचालक आणि क्लीनरचा गंभीर भाजल्याने मृत्यू झाला असून, ताहीर खान होरपळल्याने गंभीर जखमी आहे. त्याच्यावर रुग्णालयात उपचार सुरू आहेत. या तिघांविरोधात सदोष मनुष्यवध, सार्वजनिक रस्त्यावर बेदरकारपणे वाहन चालवणे, इतरांचे जीवित धोक्यात आणण्याची कृती करणे आदी भारतीय न्याय संहितेच्या कलमांसह मोटार वाहन कायद्याच्या विविध कलमान्वये गुन्हा दाखल केल्याची माहिती परिमंडळ तीनचे उपायुक्त संभाजी कदम यांनी दिली.

वाहतूक कोंडी दूर करण्यासाठी प्रयत्न

पुणे-मुंबई-बंगळूर राष्ट्रीय महामार्गावरील नऱ्हे-रावेत पट्ट्यात होणारी प्रचंड वाहतूक कोंडी आता लवकरच दूर होणार आहे. या मार्गावर प्रवासी आणि मालवाहतूक मोठ्या प्रमाणात होत असल्याने, तसेच हिंजवडी, भोसरी, चाकण एमआयडीसीमधील वाहनांचाही ताण असल्याने, वाहनांचा वेग ताशी २० किमीपेक्षा कमी झाला आहे. यावर कायमस्वरूपी तोडगा म्हणून प्रशासनाने ‘एलिव्हेटेड कॉरिडॉर’ (Elevated Corridor) बांधण्याचा निर्णय घेतला आहे. हा एक प्रकारचा उड्डाणपूलच आहे. या प्रकल्पामुळे वाहनांचा वेग ताशी ८० किमीपर्यंत वाढेल, इंधन वाचेल आणि प्रदूषणही कमी होईल.