हवामान खात्याने दिलेल्या माहितीनुसार, शनिवार ते सोमवार या कालावधीत जळगाव जिल्ह्यात थंडीच्या लाटेची शक्यता असून नाशिक जिल्ह्यात रविवार, सोमवारी, धुळे व नंदुरबारमध्ये सोमवारी थंडीच्या लाटेचा अंदाज वर्तवण्यात आला आहे. उत्तर मध्य महाराष्ट्रात कमी होणाऱ्या तापमानाचा परिणाम उत्तर कोकणातील जिल्ह्यांवरही होतो. १५ ते १७ नोव्हेंबर दरम्यान तापमान १७ अंशांपर्यंत खाली येईल, अशी शक्यता हवामान विभागाकडून वर्तवण्यात आली आहे.

जळगाव जिल्ह्यात शुक्रवारी राज्यातील सर्वांत कमी किमान तापमान नोंदवण्यात आलं. जळगाव येथे सरासरीपेक्षा ५.८ अंशांनी कमी, ९.५ अंश एवढे किमान तापमान नोंदवले गेले. नाशिक जिल्ह्यात १०.९ अंश सेल्सिअस किमान तापमान नोंदवले गेले असून उत्तर मध्य महाराष्ट्रातील तापमानाचा परिणाम उत्तर कोकणावर होत असल्याचं शुक्रवारीही समोर आले. शुक्रवारी डहाणू येथे किमान तापमान सरासरीपेक्षा ४.४ अंशांनी खाली उतरलं. डहाणूमध्ये १७.६ अंश सेल्सिअस किमान तापमानाची नोंद झाली. तर दुसरीकडे मुंबईत सांताक्रूझ इथं १८.४ व कुलाब्यामध्ये २२.६ अंश सेल्सिअस किमान तापमान नोंदवण्यात आलं. सांताक्रूझमधील किमान तापमान सरासरीपेक्षा ३.२ अंशांनी, तर कुलाबा येथे सरासरीपेक्षा १.१ अंशांनी खाली उतरले होते.

‘कमाल’ पारा कायम

ईशान्येकडील वाऱ्याचा प्रभाव अजूनही दिवसाच्या तापमानावर जाणवत नसल्याने रत्नागिरीत कमाल तापमान ३४.२ अंश सेल्सिअस नोंदवलं गेलं. कुलाबा येथे ३३.८ आणि सांताक्रूझ येथे ३३.३ अंश सेल्सिअस कमाल तापमान होतं. जळगाावात किमान तापमान १० अंशांखाली गेलं असलं तरी, कमाल तापमान ३० अंश सेल्सिअस होतं. सध्या तरी कमाल तापमानात मोठा बदल होण्याची शक्यता नाही.

दरम्यान, सध्या ईशान्येकडून येणारे वारे दिवसाच्या तापमानावर फारसा परिणाम करत नसल्याचं चित्र आहे. त्यामुळेच रत्नागिरी जिल्ह्यात दिवसाचे तापमान ३४.२ अंश सेल्सिअसपर्यंत पोहोचले. मुंबईतील कुलाबा येथेही तापमान ३३.८ अंश सेल्सिअस होते, तर सांताक्रूझमध्ये ३३.३ अंश सेल्सिअसची नोंद करण्यात आली आहे.