मुंब्रा दुर्घटनेत दोन रेल्वे अधिकाऱ्यांवर दाखल झालेला गुन्हा रद्द करावा, अशी सेंट्रल रेल्वे मजदूर संघाची मागणी आहे. त्यांच्या मते, व्हीजेटीआय (VJTI) चा अहवाल सदोष असून तो वास्तवाशी जुळत नाही. मध्य रेल्वेच्या मुंबई विभागात बाह्य संस्था रेल्वे कर्मचाऱ्यांवर खोटे आरोप लावून त्यांना त्रास देत आहे. यामुळे कर्मचाऱ्यांचे मनोबल खच्ची होत आहे आणि त्यांना रेल्वे प्रशासन किंवा बाहेरील संस्था कोणाचे ऐकावे, असा प्रश्न पडला असल्याचा दावा CRMS ने केला आहे. CRMS ने CSMT येथील फलकावर इशारा दिला आहे की, “आम्हाला आमची ओळख टिकवून ठेवण्यासाठी ‘नियमानुसार काम’ करण्यास भाग पाडू नये.”

CRMS चे अध्यक्ष प्रवीण वाजपेयी यांनी स्पष्ट केलं की, विभागीय रेल्वे व्यवस्थापक कार्यालयासमोरचे आंदोलन संपल्यानंतर पदाधिकारी आणि कार्यकर्त्यांनी उत्स्फूर्तपणे मोटारमन-गार्ड लॉबीसमोर आंदोलन केलं. CSMT आंदोलनात गुन्हा दाखल होऊन 48 तास उलटले असले तरी, पोलिसांनी अद्याप आंदोलकांना नोटीस बजावली नाही किंवा अटक केली नाही. रेल्वे पोलिसांच्या वरिष्ठ अधिकाऱ्यांनी सांगितलं की, “सारासर विचार करून तारतम्य बाळगून वरिष्ठांच्या मार्गदर्शनानुसार पावलं टाकण्यात येतील. तूर्त तपास सुरू आहे.”

नेमकं काय घडलं होतं?

मुंब्रा रेल्वे स्थानकाजवळ सुमारे 5 महिन्यांपूर्वी धावत्या लोकलमधून पडून 5 प्रवाशांचा मृत्यू झाला होता. या प्रकरणी रेल्वे पोलिसांनी दोन अधिकाऱ्यांवर गुन्हा दाखल केल्यानंतर हा गुन्हा रद्द करावा, या मागणीसाठी ‘सीआरएमएस’ने काही दिवसांपूर्वी ऐन गर्दीच्या वेळी CSMT इथं आंदोलन केलं. आंदोलकांनी CSMT मधील गार्ड आणि मोटरमन लॉबीचा प्रवेशद्वार रोखला. परिणामी लॉबीमध्ये असलेले मोटरमन-गार्ड आत अडकले आणि CSMT ला लोकल आणणारे मोटरमन-गार्ड बाहेरच राहिले. नोकरदार वर्ग घरी परतण्यासाठी CSMT मध्ये गर्दी करत असल्याने स्थानकावर प्रचंड गोंधळ उडाला होता. सदर आंदोलनामुळे लोकल खोळंबल्याने CSMT कडे जाणाऱ्या लोकलमधून चार प्रवाशांनी सॅण्डहर्स्ट रोड स्थानक परिसराजवळ रेल्वे रुळांवर उड्या घेतल्या. मात्र रुळांवरून चालत असताना मागून आलेल्या लोकलने त्यांना धडक दिल्याने दोन जणांचा मृत्यू झाला होता.