प्रत्य्यक्षदर्शींनी दिलेल्या माहितीनुसार, तिन्ही वाहनं एकाच दिशेने भरधाव वेगाने जात होती. त्यावेळी एका कंटेनरनं अचानक ब्रेक लावला. त्यावेळी कंटेनरच्या मागे एक कार होती. कंटेनरनं अचानक ब्रेक मारताच मागे असलेली कार कंटेनरला जाऊन धडकली. त्यानंतर कारच्या मागे असलेल्या कंटेनरनं कारला मागून जोरदार धडक दिली. या धडकेनंतर काही क्षणातच दोन्ही कंटेनरना आग लागली.
Pune Accident : चालत्या कंटेनरनं अचानक ब्रेक दाबला, भरधाव कार मागून धडकली, कारच्या मागून दुसरा कंटेनर घुसला; पुण्यात विचित्र अपघात; 5 जणांचा मृत्यू
अपघातानंतर मोठा आवाज झाला. त्यानंतर आसपासच्या लोकांनी घटनास्थळी धाव घेतली. एका प्रत्यक्षदर्शीनं दिलेल्या माहितीनुसार, स्फोटाचा आवाज ऐकून आम्ही अपघातस्थळी धावलो. आम्ही पोहोचलो तेव्हा कारला आग लागलेली होती. ट्रकमध्ये अडकलेला एक जण मदतीसाठी आरडाओरडा करत होता. बहुधा तो क्लिनर होता. बाहेर काढा, बाहेर काढा असं तो मोठमोठ्यानं ओरडत होता. पण आगीची तीव्रता पाहता स्फोट होण्याची भीती होती. कधीही स्फोट होईल असं वाटत होतं. त्यामुळे मदतीसाठी कोणीच पुढे गेलं नाही.

दुसऱ्या प्रत्यक्षदर्शीनं दिलेल्या माहितीनुसार, गाडीचा ब्रेक फेल झाला होता. त्यानं पुढील कंटेनरला धडक दिली. दोन कंटेनरच्या मध्ये एक फॅमिली कार होती. त्यात चार ते पाच जण होते. ती कार पूर्णपणे जळून खाक झाली. ट्रकला आग लागली. कंटेनरचा चालक आणि बाकीचे आतच राहिले. त्यांना बाहेर पडता आलं नाही. ते सगळे आतच जळून खाक झाले.

भीषण अपघातानंतर महामार्गावरील वाहतूक ठप्प झाली. अग्निशमन दलाचे जवान आणि पोलीस घटनास्थळी दाखल झाले. अग्निशमन दलानं शर्थीचे प्रयत्न करून आगीवर नियंत्रण मिळवलं. मात्र तोपर्यंत मोठं नुकसान झालं होतं.