दौऱ्याच्या वेळी तुम्ही सर्वसामान्य शेतकऱ्यांना म्हणालात की माझ्याकडे आता सत्ता नाही. मी काहीच देऊ शकत नाही. पण जेव्हा तुमच्याकडे सत्ता होती तेव्हा तुम्ही घराबाहेर निघाला नाहीत आणि कसल्याही प्रकारची शेतकऱ्यांना मदतही केली नाहीत. सामान्य माणूसही दुसऱ्याच्या घरी जर गेला तर साधा बिस्किट पुडा तरी घेऊन जातो, पण तुम्ही मात्र हात हलवीत आलात आणि हात हलवीत गेलात, असे म्हणत उपमुख्यमंत्री एकनाथ शिंदे यांनी उद्धव ठाकरे यांच्यावर कडाडून टीका केली.

महायुतीला धक्का! पवार काका-पुतणे एकत्र येणार; बहीण सुप्रिया सुळेंची साद, खुद्द अजित पवारांनीच…

उपमुख्यमंत्री एकनाथ शिंदे परभणी जिल्हा दौऱ्यावर आले होते. परभणीच्या महात्मा फुले विद्यालयाच्या प्रांगणात भव्य जाहीर सभा संपन्न झाली, यावेळी ते बोलत होते. यावेळी व्यासपीठावर माजी खासदार सुरेश जाधव माजी मंत्री जयप्रकाश मुंदडा जिल्हाध्यक्ष आनंद भरोसे जिल्हाध्यक्ष विशाल कदम लोकसभा संपर्कप्रमुख राजू कापसे यांच्यासह प्रमुख पदाधिकारी उपस्थित होते.

पुढे बोलताना उपमुख्यमंत्री एकनाथ शिंदे म्हणाले की, महायुतीचे सरकार हे शेतकऱ्यांच्या सदैव पाठीशी आहे. याच सरकारने शेतकऱ्यांसाठी आपली तिजोरी पूर्णपणे खुली केली आहे. मी मुख्यमंत्री होतो तेव्हा शेतकऱ्यांसाठी वेगवेगळ्या योजना राबवल्या. शेतकऱ्यांना विद्युत बिलामध्ये माफी देण्यात आली. त्याचबरोबर आत्ताच नुकत्याच झालेल्या अतिवृष्टीमुळे शेतकऱ्यांचे प्रचंड नुकसान झाले, पण या संकटातही महायुती सरकार शेतकऱ्यांच्या पाठीशी खंबीरपणे उभे राहिले. 31 हजार कोटी रुपयांची पॅकेज याच सरकारने शेतकऱ्यांसाठी दिले. आता कर्जमाफीचा निर्णय देखील या सरकारने घेतला आहे. लवकरच शेतकऱ्यांना संपूर्ण कर्जमाफी आम्ही करणार आहोत. त्यामुळे महायुतीचे सरकार हे देणारे आहे घेणारे नाही, असे म्हणत पुन्हा एकदा एकनाथ शिंदे यांनी उद्धव ठाकरे यांना टार्गेट केले आहे.

दिल्ली येथे अतिरेक्यांनी बॉम्बस्फोट घडवून आणला आणि निष्पाप व्यक्तींचा जीव गेला. या हल्ल्यामध्ये मृत्युमुखी पडलेल्यांना मी श्रद्धांजली अर्पण करतो, असे म्हणत देशातील सर्वच यंत्रणा ऍक्टिव्ह मोडवर आल्या असून लवकरच या बॉम्ब हल्ल्याच्या पाठीमागे असणाऱ्यांना पकडले जाईल. देशाचे गृहमंत्री अमित शहा व पंतप्रधान नरेंद्र मोदी यांनी देखील या घटनेच्या पाठीमागे असणाऱ्यांना सोडणार नसल्याचे सांगितले आहे. आता आपला देश पूर्वीचा राहिला नाही, तर आतंकवाद्यांना जशास तसे उत्तर दिले जात आहे. यापूर्वीदेखील सिंदूर ऑपरेशन असो किंवा पहेलगाम हल्ला यामध्ये देशाने अशा घटना घडविणाऱ्यांना अचूक उत्तर दिले आहे, आता देखील दिले जाईल, असे उपमुख्यमंत्री एकनाथ शिंदे म्हणाले.

त्याचबरोबर लाडकी बहीण योजना कदापिही बंद होणार नाही, असेदेखील उपमुख्यमंत्री एकनाथ शिंदे यांनी उपस्थित असलेल्या महिलांना सांगितले. कोणी काही जरी म्हणाले तरी ही योजना मी सुरू केली आहे आणि ती कदापी बंद होणार नाही, हा माझा शब्द आहे, असे ते म्हणाले. त्याचबरोबर लाडक्या भावांसाठी देखील मी शब्द दिला होता आणि त्यांचा शब्द देखील मी लवकरच पूर्ण करणार असल्याची ग्वाही यावेळी उपमुख्यमंत्री एकनाथ शिंदे यांनी दिली आहे.