गेल्या १८ वर्षांपासून उरण तालुक्यातील जासई येथील शंकर मंदिर येथून उरण- पनवेल परिसर दिंडीच्या माध्यमातून उरण ते आळंदी पायी दिंडीचे आयोजन करण्यात येत आहे. यंदाही ७ नोव्हेंबर ते १३ नोव्हेंबर या कालावधीमध्ये दिंडीचे आयोजन करण्यात आले होते. यामुळे, उरण आणि परिसरातील जासई, करळ, कामोठे, पारगावसह इतर गावांतील १५० भाविक या दिंडीत सामील झाले होते.

मंगळवारी रात्री कामशेत येथील काळभैरव मंदिर येथे मुक्काम करून बुधवारी सकाळी ५.४५ वाजता दिंडी इंदुरीच्या दिशेने रवाना झाली होती. काही किलोमीटर अंतर पुढे, एका भरधाव कंटेनर ट्रेलरने दिंडीतील भाविकांना जोरदार धडक दिली. या अपघातात उरण तालुक्यातील करळ येथील मंजुळा तांडेल (५४ ) यांचा जागीच मृत्यू झाला, तर अन्य १० भाविक जखमी झाले आहेत. यातील दोन महिला गंभीर जखमी असून त्यांच्यावर रुग्णालयात आयसीयूमध्ये उपचार करण्यात येत आहेत.

अपघातात मरण पावलेल्या मंजुळा या गेल्या तीन वर्षांपासून दिंडीमध्ये कीर्तन सेवा करीत असून सुमारे सहा वर्षांपासून प्रवचन करीत होत्या. दोन दिवसांपूर्वीच मंजुळा यांनी कीर्तन सेवा केल्याचे आयोजक धर्मा पाटील यांनी सांगितले. मंजुळा यांच्या पश्चात पती, मुलगा हितेंद्र आणि दोन विवाहित मुली आहेत. या अपघातात मंजुळा यांची बहीण अपर्णा ठाकूर या जखमी झाल्या असून त्यांना फ्रॅक्चर झाले आहे.

दिंडीतील दत्तात्रय विष्णू घरत (६२, रा. चिरनेर, उरण), हिराबाई पोशा पाटील (६५), शारदा नितीन ठाकूर (५१), कामिनी दत्तात्रय गांधी (३०, तिघेही रा. चिरले, उरण), अपर्णा अनंत ठाकूर (४२, रा. जासई, उरण), प्रभाकर लक्ष्मण तांडेल (६२, रा. करळपाडा, उरण), अशोक पायप्पा गंधाला (३०, रा. वर्सोवा, अंधेरी) या वारकऱ्यांसह नंदू अप्पा चोपडे (५५, रा. नायगाव, मावळ), ज्ञानदेव निवृत्ती गाडे (५७, रा. नाणोली, मावळ), तानाजी पुनाजी हेमाडे (२७, रा. वडेश्वर, मावळ) अशी जखमींची नावे आहेत. या प्रकरणी कंटेनर चालक चंद्रशेखर रमाकांत याच्याविरोधात कामशेत पोलिस ठाण्यात गुन्हा दाखल करण्यात आला आहे.