राधाकृष्ण विखे पाटील यांनी आज अखेर आपल्या वादग्रस्त विधानावर स्पष्टीकरण दिलं आहे. त्यांनी दोन दिवसांपूर्वी एक वादग्रस्त वक्तव्य केलं होतं. या वक्तव्यावरुन त्यांच्यावर टीका केली जात होती.
विखे पाटील यांचं स्पष्टीकरण काय?
“मी परवा एका कार्यक्रमात गेलो होतो. तिथे मी काय भाषण केलं ते दाखवलंच नाही. दुसरंच दाखवलं. कर्ज काढा आणि माफीची मागणी करा, असं वक्तव्य केल्याचं दाखवलं. मी भाषणात काय म्हणालो होतो? आपण निवडणुका लढतोय. निवडणुका येताच सोसायटी काढतो. सोसायटी थकली की पुन्हा कर्जमाफीची मागणी करतो. भाषणाचा पुढचा जो मुद्दा आहे तो दाखवलाच नाही. आता बोलायची पंचायत झाली. यापुढे मी भाषणच करणार नाही, असं ठरवलं आहे. आपला डीएनए शेतकऱ्याचा आहे”, अशा शब्दांत राधाकृष्ण विखे पाटील यांनी वादग्रस्त वक्तव्यावर आपली बाजू मांडली.
अजित पवारांनंतर राधाकृष्ण विखेंचं वादग्रस्त विधान; कर्जमाफीवरून उद्धव ठाकरेंना टोला
नेमकं काय म्हणाले होते?
“सोसायटी काढायची, कर्ज काढायचं आणि पुन्हा कर्जबाजारी व्हायचं. त्यानंतर पुन्हा कर्जमाफीची मागणी करायची. हे आपलं अनेक वर्ष काम चालू आहे. त्याची काही चिंता नाही. महायुती सरकारमध्ये मुख्यमंत्री देवेंद्र फडणवीस यांनी जाहीरच केलं आहे, शंभर टक्के आम्ही शेतकऱ्याची कर्जमाफी करणार आहोत हे आम्ही जाहीरच केलेलं आहे”, असं वक्तव्य राधाकृष्ण विखे पाटील यांनी केलं होतं. त्यांच्या याच वक्तव्यावरुन वाद निर्माण झाला होता. आता त्यांनी आपल्या वक्तव्यावर सारवासारव केली आहे.
‘विखेंची गाडी फोडणाऱ्याला 1 लाख बक्षीस देणार’, बच्चू कडूंची घोषणा
दरम्यान, राधाकृष्ण विखे पाटील यांच्या वादग्रस्त वक्तव्यानंतर त्यांची गाडी फोडणाऱ्याला आपण एक लाख रुपये बक्षीस देणार, अशी घोषणा बच्चू कडू यांनी केली आहे. “नाव राधाकृष्ण आणि कृत्य कंसासारखं करायचं. तर त्यांना पक्षातून हाकलून काढलं पाहिजे. एकीकडे देवेंद्र फडणवीस कर्जमाफीची तारीख देतात आणि हे वाचाळवीर मंत्री महोदय सांगतात की, कर्जमाफी कितीदा द्यायची. अरे लोकं तुम्हाला मारत नाही त्याबद्दल धन्यवाद माना. मी तर म्हणतो, जो राधाकृष्ण विखे पाटील यांची गाडी फोडेल त्याला 1 लाखांचं बक्षीस देईन. मी तर फोडणारच आहे. पण ही नालायकी थांबवा. हे सहन करणार नाही”, असं वक्तव्य बच्चू कडू यांनी केलं.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा