आपल्यावर हल्ल्याच्या कटाचा दावा करताना मनोज जरांगे पाटील म्हणाले की, “जालना आणि बीड जिल्ह्यातील 100 च्या आसपास सर्वपक्षीय लोक इथं बसले होते. त्यामुळे खरं काय आहे, हे सगळ्यांना माहीत आहे. तुम्ही आरोपींना पकडा, सोडा काहीही करा. पण बीडच्या नेत्याचा एका कार्यकर्ता की पीए आहे, तो पोलिसांनी माझ्या हत्येच्या कटात पकडलेल्या दोनपैकी एका आरोपीकडे गेला आणि त्याला सांगितलं की आपल्याला जायचं आहे. या आरोपींना त्या नेत्याच्या व्यक्तीने नेलं आणि पहिलं काम सांगितलं की खोटे रेकॉर्डिंग बनवा. नंतर त्यांनी दुसरा प्लॅन केला. खूनच करून टाकायचा किंवा गोळ्या देऊन, औषध देऊन घातपात करायचा असं ठरलं. मी या प्रकरणाच्या मुळाशी जाणार आहे. असल्या नीच अवलादी संपल्या पाहिजेत, तुमच्या मुला-बाळांचं टेन्शन गेलं पाहिजे, असं काम मी करणार आहे. धनंजय मुंडे यांनी माझ्याविरोधात षडयंत्र रचण्याचं काम केलं. मुंडेंच्या पीएने पकडलेल्या आरोपींपैकी एकाला परळीला नेलं. तिथं धनंजय मुंडे महत्त्वाची बैठक सुरू असताना आरोपीला भेटण्यासाठी बाहेर आले आणि 20 मिनिटं आरोपीसोबत चर्चा केली. अडीच कोटींना घातपाताची डील ठरली. पण नंतर त्यांना काहीच जुळेना म्हणून छत्रपती संभाजीनगरच्या झालटा फाटा इथं धनंजय मुंडे एक तास आरोपीची वाट पाहात थांबले. तिथं ते आरोपींना भेटले आणि गोळ्यांची वगैरे व्यवस्था करतो, असं आरोपींना सांगून धनंजय मुंडे मुंबईला गेले. आरोपी आणि धनंजय मुंडेंची वारंवार भेट झाली. भाऊबीजेच्या दिवशी पुन्हा कट रचला होता,” असा दावा जरांगे पाटलांनी केला आहे.

दरम्यान, “घातपात करून माणूस राजकारणात मोठा होत नाही. गोपीनाथ मुंडे साहेबांनी असं राजकारण नाही केलं. त्यांनी लोकांचा सामाजिक उठाव केला आणि त्यातून लोकांचं सामाजिक कल्याण केलं. पण धनंजय मुंडे नीच आहेत. लोकं मारून आणि डावं करून ते समोरच्या संपवण्याचा प्रयत्न करत आहेत,” असा गंभीर आरोपही मनोज जरांगे यांनी यावेळी केला आहे.

मराठा समाजाला आवाहन

“मराठा समाजाने शांतता पाळावी. आपण सावध आहोत म्हणून ही घटना घडायच्या आधीच उघडकीस आली. आपण सावध नसतो तर ही घटना घडून गेली असती. त्यामुळे समाजाने शांतता पाळावी. समाजाला आनंद होईल, असंच काम करणार आहे. कारण त्यांचा नायनाट नक्की करू. राज्यातील मराठा समाजाच्या नेत्यांनी, मराठा सेवकांनी आणि सर्वच मराठा संघटनांनी हा विषय अत्यंत गांभीर्याने घेतला पाहिजे. कारण आज माझ्यावर जी वेळ आली ती उद्या तुमच्यावरही येऊ शकते. त्यामुळे माझ्यावर वेळ आल्यावर तुम्ही मजा बघायची आणि तुमच्यावर वेळ आल्यावर मी मजा बघायची, असं होता कामा नये. विरोध करणं इथपर्यंत ठीक आहे, पण एखाद्याचा जीव घ्यायचा, असा प्रयत्न सुरू आहे. यामध्ये जो करणारा असेल त्यापेक्षा जो करवून घेणारा असेल तो महत्त्वाचा आहे. त्यामुळे मराठा समाजातील सरपंचापासून खासदारांपर्यंत कोणीही हा विषय सहज घेऊ नये. एकजुटीने आपल्याला असल्या वृत्तीचा नायनाट करावाच लागणार आहे. त्याशिवाय हे थांबणार नाही. पण आपल्याला शांत राहायचं आहे. काल माझ्या हत्येच्या कटाची बातमी आल्यानंतर मी शांततेचं आवाहन केलं आणि समाजानेही ते ऐकलं. असा ग्रेट समाज होणे नाही. मी सावध नसतो, तर यांचा बाप ठरलो नसतो,” असा हल्लाबोल मनोज जरांगेंनी केला आहे.