रणजितसिंह निंबाळकर यांनी आपल्या सोशल मीडिया अकाऊंटवर पोस्ट केलेल्या व्हिडिओत म्हटलं आहे की, “सर्व सहकाऱ्यांना मी आवाहन करतो, गेल्या काही दिवसांपासून वेगवेगळ्या माध्यमातून माझ्यावर आरोपांची राळ उठवली जात आहे. आपल्यालाही माहीत आहे की, जे लोक माझ्यावर आरोप करत आहेत ते चुकीच्या माहितीच्या आधारे आरोप करत आहेत. पण माझी आपल्याला कळकळीची विनंती आहे. मी काही ऑडिओ क्लिप ऐकल्या. त्यामध्ये राष्ट्रवादी शरदचंद्र पवार पक्षाचे नेते महेबूब शेख यांच्यासोबतचा फोन असेल किंवा सुषमा अंधारे यांच्याबद्दल एकेरी पद्धतीने भाषा वापरणं असेल. कृपया माझी सर्व समर्थकांना विनंती आहे की, संवैधानिक भाषेतून आपण त्यांच्याशी लढू. त्यांच्या आरोपांचे समाधान करण्याचा प्रयत्न करू. तरीही त्यांचं समाधान नाही झालं तर आपण त्यांना कायदेशीर उत्तर देऊ. मात्र अयोग्य पद्धतीने त्यांच्यावर टीका करू नये,” असं म्हणत निंबाळकर यांनी संघर्ष टाळण्याचं आवाहन केलं आहे.

दरम्यान, “आपण आपली संस्कृती, आपली परंपरा टिकवायची आहे. आपल्याला बदला घ्यायचा नाही तर बदलाव करायचा आहे. जी घोषणा आपण वर्षभरापूर्वी केलेली आहे त्या घोषणेला अनुसरून आपलं वागणं असावं,” असंही कार्यकर्त्यांना उद्देशून रणजितसिंह नाईक निंबाळकर म्हणाले.

निंबाळकरांवर नेमका आरोप काय?

शिवसेना उद्धव बाळासाहेब ठाकरे पक्षाच्या नेत्या सुषमा अंधारे यांनी मागील दोन दिवसांत प्रसारमाध्यमांसमोर येत रणजितसिंह निंबाळकर यांच्याविरोधात आरोपांची राळ उडवून दिली आहे. “फलटणच्या महिला डॉक्टरची आत्महत्या नसून, संस्थात्मक हत्या असल्याचा आमचा दाट संशय आहे. माजी खासदार रणजितसिंह नाईक निंबाळकर यांच्या दबावातून हा प्रकार घडला असून मुख्यमंत्र्यांनी त्यांना क्लीन चिट देण्याची घाई करू नये. क्लीन चिट म्हणजे पोलिसांनी तपास थांबवण्याचे अलिखित संकेत असून या प्रकरणी चौकशीसाठी उच्च न्यायालयाने समिती स्थापन करावी,” अशी मागणी सुषमा अंधारे यांनी पत्रकार परिषदेत केली. “निंबाळकर हे बीड जिल्ह्यातील ऊसतोड कामगार त्यांच्या साखर कारखान्यासाठी आणत होते. कामगार कारखाना सोडून जाऊ नयेत म्हणून ते कामगारांच्या तंदुरुस्तीचे प्रमाणपत्र देण्यासाठी महिला डॉक्टरवर दबाव टाकत. याबाबत संबंधित महिलेनं वरिष्ठांनाही पत्र दिलं होतं,” असा दावा अंधारे यांनी केला आहे.