बच्चू कडू यांच्या नेतृत्वातील शेतकरी आंदोलनामुळे राज्य सरकारवर मोठा दबाव निर्माण झाला आहे. शेतकऱ्यांच्या सरसकट कर्जमाफीसह अनेक मागण्यांसाठी बच्चू कडू यांचं आंदोलन सुरु आहे. या आंदोलनात आता मनोज जरांगे पाटील यांचीदेखील एन्ट्री होणार आहे. त्यामुळे सरकारचं टेन्शन वाढण्याची शक्यता आहे.
बच्चू कडूंनी पुकारलेल्या आंदोलनाने चार महामार्गांची वाहतूक ठप्प केली. त्यामुळे राज्य सरकारचं टेन्शन वाढलं होतं. विशेष म्हणजे कोर्टात या प्रकरणी सुमोटो याचिका दाखल झाली. कोर्टाने संध्याकाळी सहा वाजेपर्यंत आंदोलनस्थळ रिकामं करण्याचे आदेश दिले. बच्चू कडू यानंतर नागपूर पोलिसांकडे स्वत:हून अटक होण्यासाठी पायी निघाले होते. त्यांच्यासह हजारो आंदोलक पोलीस ठाण्याच्या दिशेला निघाले होते. या दरम्यान एक महत्त्वाची माहिती समोर आली.
नागपुरात मोठ्या घडामोडी
राज्य सरकारचं शिष्टमंडळ रात्री आठ वाजता बच्चू कडू यांच्या भेटीसाठी नागपुरात दाखल झालं. राज्य सरकारकडून मंत्री पंकज भोयर, मंत्री आशिय जयस्वाल या दोन मंत्र्यांच्या शिष्टमंडळाने नागपुरात खापरी येथे भेट घेतली. यावेळी सरकारच्या शिष्टमंडळातील मंत्र्यांचं आणि आंदोलकांच्या शिष्टमंडळाचं जवळपास तासभर चर्चा झाली. प्रसारमाध्यमांच्या कॅमेऱ्यासमोर ही चर्चा झाली. या दरम्यान सरकारचं शिष्टमंडळ वरिष्ठांसोबत बोलण्यासाठी बाजूला गेलं होतं.यानंतर बच्चू कडू यांची मनधरणी करण्यात शिष्टमंडळाला यश आलं. बच्चू कडू यांच्या मागण्यांबाबत चर्चा करण्यासाठी शिष्टमंडळाने मुख्यमंत्र्यांची भेट घेण्याची विनंती केली. त्यानुसार बच्चू कडू यांचं शिष्टमंडळ उद्या मुख्यमंत्री देवेंद्र फडणवीस यांची भेट घेणार आहे. असं असलं तरी आंदोलन रात्रभर सुरुच राहणार असल्याची भूमिका बच्चू कडू यांनी मांडली. तसेच मुख्यमंत्र्यांच्या भेटीसाठी गेलो असता आंदोलकांना प्रशासनाकडून कोणताही त्रास होणार नाही, अशी ग्वाही बच्चू कडू यांनी सरकारच्या शिष्टमंडळाकडून घेतली.
मनोज जरांगे काय म्हणाले?
दुसरीकडे मनोज जरांगे आज रात्री उशिरा आंदोलनस्थळी दाखल होण्याची शक्यता आहे. त्यामुळे या आंदोलनाला आणखी बळ मिळण्याची शक्यता आहे. “शेतकरी सगळे नागपुरला बसले आहेत. ज्यावेळेस अटीतटीची वेळ असते त्यावेळेस आपण आपल्या शेतकरी मायबापांसाठी सगळ्यांनी सहकार्य केलं पाहिजे. नागपूरची परिस्थिती कशी झाली, तिथले गोरगरीब, दिव्यांग बांधव बसले आहेत. तिथे शेतकरी वर्ग बसला आहे. तिथे खूप अटीतटीची वेळ आहे. त्यामुळे या वेळेला खमक्यापणे खंबीरपणे शेतकऱ्यांच्या पाठिशी उभं राहिलं पाहिजे म्हणून आम्ही तातडीने लगेच नागपूरकडे निघालो आहोत. शेतकऱ्यांचं म्हणणं आपण जाणून घ्यायला पाहिजेत. त्यांना साथ दिली पाहिजे या दृष्टीकोनाने आम्ही तातडीने नागपूरकडे निघालो आहोत”, अशी माहिती मनोज जरांगे पाटील यांनी दिली.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा