शाब्दिक वाद क्षणात तुफानी भांडणात

या प्रकरणात नेमकं घडलं असं की, अर्चना कांदे चव्हाण आणि त्यांची आई लताबाई भोसले या पाथर्डी बसस्थानकातून अहिल्यानगरकडे जाणाऱ्या एस.टी. बसमध्ये बसल्या होत्या. त्याच बसमध्ये प्रवास करणाऱ्या मेघा संजय भोसले यांचा पाय अर्चना यांच्या पिशवीला लागला आणि मग काय? बास्स… यावरून सुरू झालेला शाब्दिक वाद क्षणात तुफानी भांडणात बदलला. बसचालकाने परिस्थिती हाताबाहेर जात असल्याचे पाहून बस थेट पाथर्डी पोलिस ठाण्यात नेली. मात्र, तिथेही महिलांचा संताप कमी नाही झाला. त्यांनी पुन्हा एकमेकींवर तुटून पडत पोलीस ठाण्यातही फ्री स्टाईल हाणामारी केली.
Sindhudurg News: सिंधुदुर्गात राणे बंधू एकमेकांविरुद्ध दंड थोपटणार, कोकणातील राजकीय रणधुमाळीत संघर्ष अटळ; दोघांनीही दिले संकेत

चारही महिलांविरोधात पाथर्डी पोलीस ठाण्यात गुन्हा नोंद

ठाण्यातील पोलिस महिला कर्मचाऱ्यांनी मोठ्या शर्थीने त्यांचे भांडण सोडवले. अर्चना चव्हाण यांनी पोलिसांना निवेदन दिले मेघा भोसलेने माझ्या आईला बसमध्ये मारहाण केली आहे. तर दुसऱ्या बाजूनेही मेघा भोसले या महिलेने अर्चना चव्हाण व लताबाई भोसले यांनीही मला व माझ्या मावशीला शिविगाळ केली आणि मारहाण केल्याचं म्हणत कारवाईची मागणी केली. महिला पोलिसांनी तात्काळ हस्तक्षेप करून परिस्थिती नियंत्रणात आणली आणि या चारही महिलांना ताब्यात घेतले. दोन्ही बाजूंनी परस्पर तक्रारी दाखल झाल्या असून पाथर्डी पोलीस ठाण्यात गुन्हा नोंदविण्यात आला आहे.

व्हिडिओ सोशल मीडियावर व्हायरल

दरम्यान, या घटनेचा व्हिडिओ सोशल मीडियावर व्हायरल होत असून नागरिकांमध्ये या प्रकाराची चांगलीच चर्चा रंगली आहे. सणासुदीच्या काळात बसमधील छोट्याशा वादातून उफाळलेल्या या हाणामारीच्या नाट्याने पोलिस ठाण्यालाच रणांगणाचे रूप दिले होते.