वडेट्टीवार यांनी सांगितले की, “मराठा आरक्षणासंदर्भातील शासन निर्णय हा मराठवाड्यापुरता मर्यादित असल्याचे सांगितले जात असले, तरी त्या निर्णयानुसार मिळणारे प्रमाणपत्र हे फक्त चार जिल्ह्यांपुरते मर्यादित नसून संपूर्ण देशभर वैध राहते. त्यामुळे ओबीसी समाजाच्या आरक्षणावर त्याचा थेट परिणाम होणार आहे. या निर्णयामुळे समाजाची दिशाभूल करण्यात येत आहे.”
Beed News: ‘मला पक्षाची सत्ता आणायची आहे, मी जरांगे पाटील यांच्या…’; पंकजा मुंडे नेमकं काय म्हणाल्या?
वडेट्टीवार यांनी भाजपचे प्रदेशाध्यक्ष चंद्रशेखर बावनकुळे यांच्यावरही जोरदार टीका केली. ते म्हणाले, “बावनकुळे हे स्वतः ओबीसी समाजातून आलेले नेते आहेत. ओबीसींमुळेच त्यांना आज राजकीय पद मिळाले आहे. भाजपने एकेकाळी त्यांना अडगळीत टाकले होते. आता पुन्हा पद मिळाल्याने त्यांनी खुर्चीसाठी वाहत जाऊ नये. समाजाच्या हितासाठी त्यांनी ठाम भूमिका घ्यावी.” असेही वडेट्टीवार म्हणाले.

ओबीसी मोर्चानंतरही सरकारकडून प्रतिसाद न मिळाल्याने आता पुढील लढ्याची दिशा ठरवण्यासाठी १ नोव्हेंबर रोजी नागपुरात विदर्भातील आणि राज्यातील प्रमुख ओबीसी नेत्यांची बैठक घेण्यात येणार असल्याचे वडेट्टीवार यांनी सांगितले. “या बैठकीत शासन निर्णय रद्द करण्यासाठी कोणती रणनीती आखावी, पुढील आंदोलनाची रूपरेषा काय असावी, यावर सविस्तर चर्चा होईल. त्यानंतर आमची पुढील भूमिका सार्वजनिक केली जाईल,” असे त्यांनी नमूद केले.

वडेट्टीवार यांनी स्पष्ट केले की, “आम्ही मराठा समाजाचे विरोधक नाही. मराठा समाजालाही आरक्षण मिळाले पाहिजे, पण ते ओबीसींच्या वाट्यातून नको. आमच्या समाजाचा अधिकार कुणी हिरावून घेऊ नये.” राज्य सरकारने तात्काळ जीआर रद्द करून ओबीसींच्या आरक्षणावरील संभ्रम दूर करावा, अन्यथा मोठ्या आंदोलनाची चेतावणीही वडेट्टीवार यांनी दिली आहे.